Aqtóbe oblysyndaǵy iri kásiporyndar jumysshylardyń eńbekaqysyn kóterýde.

Aqtóbe oblysynda QR Prezıdenti Nursultan Nazarbaevtyń «Qazaqstandyqtardyń ál-aýqatynyń ósýi: Tabys pen turmys sapasyn arttyrý» atty Joldaýyndaǵy tapsyrmalardy júzege asyrý aıasynda «Qazhrom» TUK» AQ, «Aqtóbe mys kompanıasy» JSHS, «Vosqod-Oriel» JSHS jáne «Qazaqoıl-Aqtóbe» JSHS men basqa da iri kásiporyndar 2019 jyldan bastap jumysshylarynyń aılyqtaryn kóteredi.

Atap aıtqanda, 1 qańtardan bastap Eýrazıalyq top quramyna kiretin «Qazhrom» TUK» syndy bólimshelerdiń qyzmetkerleriniń eńbekaqylary 9-14 paıyzǵa óspek. Arman Esenjolov sonyń ishinde jumysshy mamandyqtarynyń aılyǵy birshama ósetinin málimdedi. Budan basqa, qyzmetkerler úshin ujymdyq kelisimshartpen qatar, basqa da túrli áreket etýshi áleýmettik baǵdarlamalar saqtalatyn bolady.

«AMK» JSHS qyzmetkerleriniń aılyqtary jańa jyldan bastap 4 paıyzǵa, «Vosqod-Oriel» JSHS qyzmetkerleriniki 9 paıyzǵa ósedi. «Qazaqoıl-Aqtóbe» JSHS jumysshylarynyń da aılyqtary kelesi jyldyń qańtar aıynan bastap 7-10 paıyzǵa kóteriledi.

Elbasynyń azamattardyń ál-aýqatyn kóterý boıynsha tapsyrmalaryna sáıkes óńirdegi birqatar kásiporyndar jańa jyldyq merekelerge oraı jumysshylaryna syıaqylar men 13-shi aılyqtaryn beredi.

Aıta keteıik, osy jyldyń qazan aıynda ótken memleket basshysy joldaýynyń mindetterin túsindirý kezdesýde Aqtóbe oblysyndaǵy ónerkásip salasynda, munaı-gaz sektorynda, óńdeý salasynda, qurylys jáne jol-kólik ındýstrıasynda jumys jasaıtyn 200-ge tarta kásiporyn memleket basshysynyń jumysshylardyń aılyǵyn kóterý týraly bastamasyn qoldap, soǵan sáıkes Qazaqstandaǵy barlyq kásiporyndarǵa úndeý aıtty.

Bıyl óńirdegi 53-ten asa iri kásiporyn men kompanıalar eńbekaqyny 7-20 paıyzǵa deıin kóterdi.