QR Táýelsizdigi kúni qarsańynda Aqtóbede Almaty men Astanadan keıingi Qazaqstandaǵy úshinshi «Qazposhta» AQ Batys» óńirlik logıstıkalyq ortalyǵy ashyldy. Ortalyq Qostanaı, Mańǵystaý, Atyraý, Batys Qazaqstan jáne Aqtóbe oblystaryna qyzmet kórsetetin bolady.
Aqtóbe oblysynyń ákimi Berdibek Saparbaev óńir basshylyǵynyń jumys oryndaryn quryp, salyq salynatyn negizderdi arttyrýǵa múmkindik beretin osyndaı nysandardyń ashylýyna qyzyǵýshylyq tanytyp otyrǵanyn atap ótti.
* Elbasy aldymyzǵa jańa tehnologıalardy engizý, elektrondy saýdany damytý mindetin qoıdy. Biz Prezıdent tapsyrmasyn oryndaýǵa baǵyttalatyn jáne jalpy óńirdi damytýǵa oń áserin tıgizetin barlyq jobalardy qoldaýǵa ázirmiz. Bizdiń oblys Eýropa men Azıany qosatyn Qazaqstannyń batys qaqpasy bolyp tabylady, Qytaı taýarlary biz arqyly ótý úshin qoldaǵy barlyq múmkindikti barynsha paıdalanýymyz qajet,- dep atap ótti oblys ákimi Berdibek Saparbaev.
* Buryn sálemdemelerdiń basym bóligi aldymen Almatynyń suryptaý ortalyǵyna jetkiziletin. Endi Eýropa men TMD elderinen keletin sálemdemeler birden Aqtóbeniń kedendik baqylaýynan ótedi. Bul sálemdemeni ıesine jetkizý merzimin alty kúnge deıin qysqartyp, poshtanyń taǵy bir tranzıttik aıyrbastaý pýnktin alyp tastaı otyra, Almatydaǵy logıstıkalyq ortalyqqa túsetin júktemeni azaıtady. Buryn Aqtóbede kúnine 6 myńǵa jýyq jóneltim óńdelse, endi óńdelgen poshtalardyń kólemi kúnine 20-25 myńǵa deıin ósedi,-dedi jańa ortalyqtyń birqatar artyqshylyqtaryn atap ótken «Qazposhta» AQ-nyń poshta bıznesi jónindegi atqaýrshy dırektory Sáýle Egemberdıeva.
Hab - Reseı, Moldova, Qyrǵyzstan, Ózbekstan elderinen, jergilikti, TMD men Qytaıdan kelgen sálemdemelerdi tıeıtin suryptaý pýnkti. Olar kedendik baqylaý men suryptaýdy hab aýmaǵynda júrgizetin bolady. Bul sálemdemelerdi jetkizý merzimin qysqartýǵa múmkindik beredi. Taýardy suryptaý ýaqyty da aıtarlyqtaı qysqarmaq. Logıstıkalyq ortalyq zamanaýı jabdyqpen, qaýipsizdik jáne beıneqabyldaý júıelerimen, sonymen qatar, kedendik baqylaý jáne tekserý aımaqtarymen jaraqtanǵan. Munda sonymen qatar, óndiristik qýattylyǵy 160 myń sálemdeme bolatyn fýlfılment ortalyǵy jumys jasaıtyn bolady.
Habtyń jalpy aýmaǵy 3500 sharshy metr. Seksen jumys orny quryldy.
