Aqtóbede ótken halyqaralyq konferensıaǵa álemniń 120-dan asa kórnekti ǵalymdary jınaldy.
Q.Jubanov atyndaǵy Aqtóbe óńirlik memlekettik ýnıversıtetinde «Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń strategıasy – aımaqtyq damýdyń draıveri» halyqaralyq ǵylymı-tájirıbelik konferensıasy ótti.
Sharanyń maqsaty – Qazaqstan Respýblıkasynyń tuńǵysh Prezıdenti – Elbasy N.Á. Nazarbaevtyń Qazaqstannyń aımaqtaryn damytý boıynsha strategıasynyń mańyzyn kórsetý; sheteldik jáne otandyq sarapshylar qoǵamdastyǵynyń pikirin talqylaý úderisinde aımaqtyq sátti damýdyń faktory retinde Batys Qazaqstannyń ekonomıkalyq, áleýmettik-saıası, rýhanı-mádenı áleýetin damytý týraly bilimdi keńeıtý.
Konferensıa jumysyna álemniń 15 memleketinen, sonyń ishinde QHR, Ońtústik Koreıa, Túrkıa Respýblıkasy, Indıa Respýblıkasy, Reseı Federasıasy, Ózbekstan, Qyrǵyzstan elderinen, sonymen qatar, Qazaqstannyń jıyrma joǵary oqý ornynan kelgen 126 ǵalym qatysty.
- Aqtóbede Prezıdent Nursultan Nazarbaevtyń Táýelsiz Qazaqstannyń qalyptasýy men órkendeýindegi róli týraly konferensıa ótkizý biz úshin úlken qýanysh ári qurmet. Jýyrda biz Táýelsizdigimizdiń 27 jyldyǵyn atap ótemiz. Qazaqstan osyndaı qysqa tarıhı kezeń ishinde Ult kóshbasshysynyń dana saıasatynyń arqasynda búkil álemge tanyldy. Konferensıaǵa qatysýshylardyń barlyǵy ózderi úshin jańa dúnıelerdi ashady dep senemin. Shynynda, pikir almasý, pikirtalastar men dıalog barysynda jaqsy ıdeıalar paıda bolady, - dedi Aqtóbe oblysynyń ákimi Berdibek Saparbaev sálemdesý sózinde.
Óńir basshysy sondaı-aq, aqtóbelik jastardy ulttyq salt-dástúrdi saqtap, zamanaýı joǵary bilim alýǵa, básekelestikke qabiletti maman jáne Otanynyń patrıoty bolýǵa shaqyrdy.
Elbasy kitaphanasy dırektorynyń birinshi orynbasary, saıası ǵylymdarynyń doktory, profesor Ámirhan Rahymjanov «Prezıdent Nursultan Nazarbaevtyń Qazaqstan óńirleriniń damýy jónindegi strategıasy» taqyrybynda baıandama jasady.
- Tarıhı úderistiń turǵysynan alǵanda, 27 jyl qysqa ýaqyt kezeńi bolyp tabylady, biraq eldiń saıası, ekonomıkalyq jáne áleýmettik salalaryndaǵy ózgerister qarqynynyń óskeni sonshalyq, bul ózgeristerdiń aýqymy 90-jyldardyń basynda jas memlekettiń alǵashqy qadamdaryna kýá bolǵan adamdardy tań qaldyrmaı qoımaıdy. Prezıdent júrgizip otyrǵan saıasattyń negizgi postýlaty árqashan eldegi beıbitshilik pen kelisimdi saqtaý boldy. Alǵashqy kúnderden bastap reformalardyń áleýmettik baǵdarlanýyna basa nazar aýdaryldy.
Memleket basshysyna sheshimderdi ýaqytyly qabyldaýǵa, ýaqyttyń qıyndyqtaryna jaýap berýge, jaǵdaıdy óte qıyn kezde túzetýge týra keldi. Sonymen birge Nursultan Nazarbaev árqashan jaýapkershilikti ózine aldy, - dedi profesor.
Óz sózinde ol konferensıany Qazaqstan elordasynyń 20 jyldyǵyn merekeleý jyly ótkizýdiń sımvoldyǵyn atap ótti.
- Astana jıyrma jyl ishinde táýelsiz Qazaqstannyń tabysy men gúldenýiniń nyshanyna aınaldy. Osy múmkindikti paıdalana otyryp, elorda turǵyny retinde aqtóbelikterge astana mereıtoıyna tartý etken biregeı syılyq - «Beıbitshilik qabyrǵasy» eskertkishi úshin alǵys aıtamyn. Onyń ashylý rásimi halyqaralyq ıadrolyq synaqqa qarsy áreket kúni ótti. Memleket basshysy Astanada ornatylǵan biregeı eskertkishtiń tarıhymyzdyń sabaqtaryn bilip, este saqtaýǵa, bizdiń óz jerimizde qurǵan beıbitshilik pen ıgilikti qurmetteýge shaqyrý bolyp tabylatynyn atap ótti. «Beıbitshilik qabyrǵasy» - bul zamandastarǵa beıbitshilik qundylyqtary men ótkenniń qaıǵyly betteriniń qaıtalanýyna jol bermeý týraly taǵy bir eskertý. 11 qazanda álemdik jáne dástúrli dinder kóshbasshylarynyń 6-shy sezi aıasynda «beıbitshilik» sózi 51 tilde jazylǵan «Beıbitshilik qabyrǵasynda» túrli din ókilderi osy jerdegi beıbitshilik pen kelisim úshin qasıetti duǵalaryn oqydy,- deıdi Ámirhan Rahymjanov .
Konferensıaǵa qatysýshylar Qazaqstan aımaqtaryn damytý boıynsha N.Á.Nazarbaev strategıasynyń mánmátininde álemdik qoǵamdastyqtaǵy Qazaqstannyń bedeli men halyqaralyq mártebesin arttyrý faktory retinde Tuńǵysh Prezıdent – Elbasynyń ishki saıası bastamalary men etnıkaaralyq, konfesıaaralyq kelisim men rýhanı damý, «Prezıdenttiń bes áleýmettik bastamasy» jobasy, Memleket basshysynyń «Bolashaqqa baǵdar: qoǵamdyq sanany jańǵyrtý» baǵdarlamalyq maqalasyn júzege asyrý salasyndaǵy ǵylymı zertteýler nátıjesin talqylady.
İs-shara Qazaqstan Respýblıkasynyń Tuńǵysh Prezıdenti – Elbasy kitaphanasynyń «N. Nazarbaev: dáýir, tulǵa, qoǵam» kóshpeli kórme jobasy aıasynda ótkizildi. Joba boıynsha aýqymdy ǵylymı-bilim berý jáne mádenı-aǵartý sharalary, sonymen qatar Aqtóbe oblysy boıynsha kóshpeli ekskýrsıalar uıymdastyrylady. Joba Elbasy kitaphanasynyń jınaqtarynan usynylǵan qor kórmesine negizdelgen. Kórme 14 qarashadan bastap Aqtóbe oblystyq tarıhı-ólketaný murajaıynyń jańa ǵımaratynda eksponattalýda. Aqtóbe turǵyndary men qonaqtary 2019 jylǵy qańtar aıynyń sońyna deıin kórmeni tegin tamashalaı alady.
