Aqtóbedegi tuńǵysh Check-up ortalyǵynyń qurylysyn 2019 jyly aıaqtaý josparlanyp otyr. Bul týraly Aqtóbe oblysynyń ákimi Berdibek Saparbaev Ońtústik Koreıaǵa barǵan jumys saparyn qorytyndylaı kele málimdedi.
- Bizdiń saparymyz Prezıdent Nursultan Nazarbaevtyń damyǵan eldermen ekijaqty ózara qarym-qatynasty ornatý týraly tapsyrmasy aıasynda ótti. Sapardyń negizgi maqsaty – Koreıadaǵy aldyńǵy qatarly tehnologıalar men ınovasıalardy alý jáne engizý. Sonyń ishinde bizdi energıanyń balamaly kózderin paıdalaný jobalary qyzyqtyrady. Biz Qazaqstannyń Koreıa Respýblıkasyndaǵy elshiligimen birge seriktestik jáne tájirıbe almasý jumysyn jalǵastyramyz,- dedi Berdibek Saparbaev. Aqtóbelik delegasıa densaýlyq saqtaý salasyndaǵy jańa tehnologıalarǵa erekshe nazar aýdardy.
- Sońǵy úsh jylda Ońtústik Koreıanyń aldyńǵy qatarly medısına mekemleriniń biri – Seýl ulttyq ýnıversıtetimen tyǵyz áriptestik qarym-qatynas jolǵa qoıyldy. Aqtóbede baýyr men búırek almastyrý, býyn aýystyrý otalary birge jasaldy. Aqtóbelik balalar Ońtústik Koreıada tegin emdeldi, ońtústik koreıalyq jetekshi dárigerler aqtóbelik áriptesterin oqytty. Biz osy jumystyń jalǵasýy jaıly kelistik. Sondaı-aq, kelesi jyly Aqtóbedegi Check-up ortalyq qurylysyn aıaqtaýǵa kelistik, - dedi Aqtóbe oblysynyń ákimi.
Aqtóbedegi quny 5 mlrd teńge bolatyn Check-up keshendi dıagnostıkalyq ortalyǵynyń qurylysy Seýl ulttyq ýnıversıtetimen birge memlekettik-jeke seriktestik aıasynda júzege asyrylýda. Ortalyqtyń biregeıligi – árbir adam tórt saǵattyń ishinde tolyq tekserýden ótip, densaýlyǵy jaıly barlyq aqparatty bile alady.
Budan buryn habarlaǵandaı, Berdibek Saparbaev Koreıaǵa sapary kezinde munaı-gaz, qurylys ınjenerıasy men densaýlyq saqtaý salalary boıynsha álemdik deńgeıdegi kompanıalardyń basshylarymen kezdesti. Atap aıtqanda, K-Medical Lab korporasıasynyń bas dırektory Lı Kyn Engpen kelissózder júrgizildi. Kezdesý barysynda ekijaqty seriktestik máseleleri talqylandy. K-Medical Lab basshysy túrli baǵyttaǵy alty joǵary tehnologıalyq medısına mekemesiniń qurylys jobalaryn tanystyrdy. Aqtóbelik delegasıany onkologıalyq ortalyqtyń, sonymen qatar, ana men balaǵa bosanǵannan keıingi kútim ortalyǵynyń jobalary erekshe qyzyqtyrdy. Berdibek Saparbaev atalmysh bastamalar boıynsha sheshimniń jete zertteýden soń qabyldanatynyn atap ótti. K-Medical Lab korporasıasymen kelissózder keler jyldyń basynda jalǵaspaq. Budan basqa, densaýlyq saqtaý salasyndaǵy ekijaqty qarym qatynasty damytý máseleleri óńir basshysy men Seýl ulttyq ýnıversıtetiniń rektory Óong Hak Kımmen kezdesý kezinde qaraldy.
