Aqtóbe oblysynda memleket basshysy bastamashylyq etken jobaǵa attas arnaıy jobany tıimdi júzege asyrýǵa baǵyttalǵan «Aýyl – el besigi» forýmy ótti.
Bıznes pen memlekettik qurylymdardyń ókilderi Alǵa aýdanynyń Amangeldi aýylyna jınalyp, mesenattyqty aýyldardy qoldaý quraly retinde damytý máselesin talqylady. Sharanyń basty maqsaty – mesenattyq pen qaıyrymdylyqqa yntalandyrý jáne dástúrge engizý mehanızmderin jasaý.Forýmǵa qatysý úshin oblysqa ataqty sportshy, Olımpıada oıyndarynyń chempıony Jaqsylyq Úshkempirov, «Meniń Atamekenim» qoǵamdyq birlestiginiń atqarýshy dırektory Lázzat Shyńǵysbaeva keldi. Oblys ákimi sharaǵa qatysýshylarǵa qarata aıtqan sózinde aqtóbelikterdi memleket basshysynyń aýyldyq aýmaqtardyń áleýmettik ortasyn jańǵyrtý boıynsha qoıǵan tapsyrmasyn júzege asyrýǵa belsendi túrde at salysýǵa shaqyrdy.
- Birde bir kásipkerdiń syrt qalmaýyn suraımyn. Qaıdan shyqqandaryńyzdy, kimniń jáne neniń arqasynda tabysqa qol jetkizgenderińizdi umytpańyzdar. Turaqtylyqtyń, týǵan jerdiń, halyqtyń, memleket pen Prezıdenttiń qoldaýy bolmaǵanda tabysty bıznes te bolmas edi. Árqashan osyny jadyńyzda ustańyzdar. Árbir aqtóbelik Elbasynyń barlyq áleýmettik bastamalaryn júzege asyrý úshin óz úlesterin qosýlary kerek,-dep atap ótti Berdibek Saparbaev.
Týǵan aýylyna jasaǵan qamqorshylyq tájirıbesimen ataqty sportshy Jaqsylyq Úshkempirov te bólisti. Ol sporttyq mansaby aıaqtalǵan soń týǵan jeri - Almaty oblysyndaǵy Myńbaev aýylyna baryp mal sharýashylyǵymen aınalysqan. Tabysty sharýa týǵan aýylynyń qajettilikterin de umytqan joq. Jaqsylyq Úshkempirov óz aqshasyna 15 shaqyrymdyq gaz qubyryn, 200-den asa bala erkin jáne grek-rım kúresterimen, dzúdomen jáne bokspen aınalysyp júrgen sport mektebin saldy. Ol sondaı-aq aýyldastaryna balabaqsha, dárigerlik ambýlatorıa men elý jas otbasy úshin qol jetimdi baspana tartý etti. Týǵan aýylynyń aýyl sharýashylyǵyn damytyp, óz úlesin qosqany úshin Elbasy byltyr Jaqsylyq Úshkempirovke "Qazaqstannyń Eńbek Eri" ataǵyn berdi.
Mesenat:
* Munyń bárin men ne úshin istep jatyrmyn? Munyń bárin men ózimmen alyp ketpeımin. Osynyń bári bizdiń urpaqtarymyz týǵan jerin súıetin jaqsy adam bolyp ósýleri úshin. Tek biz, qazaqstandyqtar, elimizdi myqty ári tabysty qyla alamyz. Sol úshin kúni-túni
eńbektenýimiz kerek. Qazaqstanda nebári 5,5 myń aýyl ǵana bar. Eger árbir tabysty kásipker belgili bir aýylǵa qamqorshylyq jasasa, elimiz gúldenetin bolady! Búginde Qazaqstandaǵy 600-ge jýyq aýyl aýqatty jerlesteriniń kýratorlyǵynyń arqasynda qaıta jandandy. Bul is jalǵasýy tıis,-degen senimde.
Aıta keteıik, osy jyldyń basynan beri Aqtóbe oblysynda aýyldy qoldaýdyń birneshe aýqymdy jobalary júzege asyrylýda. Sonyń ishinde «Aýyl qamqorshysy» jobasy bar, onyń aıasynda kásipkerler aýyldardy qamqorshylyqqa alýda. Búginde bıznesmender 1,7 mlrd teńgege kómek kórsetti. Máselen, «Aktep» JSHS dırektory Nurlan Saǵynalın Alǵadaǵy eki kósheni jaryqtandyrýǵa, 19 aýlany abattandyrýǵa jáne qyryq oıyn alańyn ornatýǵa 40 mln teńge aýdardy. «Nektar» ÓK basshysy Shamıl Kaspranov 31 mln teńgege Tamdy aýylyndaǵy dárigerlik ambýlatorıa ǵımaratyna kúrdeli jóndeý júrgizdi. «Parıj komýnasy HHİ» JSHS dırektory Gaık Terterán Eset batyrdyń memorıaldy keshenin abattandyrýǵa 13 mln teńge bóldi. «Jaqıa» qaıyrymdylyq qorynyń quryltaıshysy Janbolat Sársenov Araltóbe aýylyndaǵy sporttyq jáne oıyn alańdaryn salýǵa, mektepti materıaldyq-tehnıkalyq jaǵynan jabdyqtaýǵa 90 mln teńge bóldi.
Forýmnyń qorytyndysy boıysha áleýmettik mańyzdy jobalardy oblystyń 12 aýdanyndaǵy aýyldarda jáne Aqtóbe qalasynda júzege asyrý týraly memorandýmdarǵa qol qoıyldy. Atap aıtqanda mesenattar Qobda aýdanynyń Qarakemer aýylyndaǵy alpys oryndyq mekteptiń, Áıteke bı aýdanynyń Qarabutaq aýylyndaǵy jabyq sport kesheniniń, Mártók aýdanynyń Hazret aýylyndaǵy dárigerlik ambýlatorıanyń, Shalqar qalasyndaǵy Jastar saraıynyń jáne t.b. qurylysyn qarjylandyrýdy óz mindetterine aldy. Qol qoıylǵan memorandýmdardyń jalpy somasy - 524 mln teńge.
Budan ózge, shara aıasynda «Jomart júrek» syılyǵynyń oblystyq kezeńiniń jeńimpazdary atanǵan oblys mesenattary marapattaldy. Olardyń bári de óńir turǵyndaryna kómek kórsetip, osynda iri qaıyrymdylyq jobalaryn júzege asyrǵan.
Aıta ketý kerek, forým jergilikti kásipker Samat Qaldyǵulovtyń qarajatyna salynǵan aýyl klýbynyń jańa ǵımaratynda ótti. Amangeldi aýylynyń týmasy klýb pen demalys saıabaǵynan turatyn Demalys ortalyǵyn jabdyqtaýǵa 118 mln teńge bólgen.
* Men osy kishkentaı aýylda týyp-óstim. Sondyqtan, Prezıdentimizdiń úndeýin oryndaı otyra maǵan aýyldastarym demalyp, bos ýaqytyn tıimdi ótkizýleri úshin týǵan aýylymda Demalys ortalyǵyn ashý týraly oı keldi. Bizdiń elde bıznesti damytý úshin barlyq jaǵdaı
jasalǵan. Osy joba basqa kásipkerler úshin úlgi bolady jáne olar da týǵan jerlerin damytý úshin óz úlesterin qosady dep senemin,-dedi S.Qaldyǵulov.
Oblysta patrıot otandastardyń qatysýymen osy jyldyń sońyna deıin «Týǵan jerge taǵzym» aksıasy aıasynda 3 mlrd-tan astam teńgege 786 joba júzege asyrylmaq. Atap aıtqanda, jańa áleýmettik nysandar salynyp, joldar men kópirler jóndeldi, eldi mekender abattandyryldy, bilim berý nysandarynyń materıaldyq-tehnıkalyq bazasy kúsheıtildi, qaıyrymdylyq sharalary ótkizildi.
Óńirde sondaı-aq, «Aýyl – el besigi» jobasynyń bir bóligi - «Ár aýylǵa – bir qamqorshy» aksıasy da belsendi qoldaý tapty. Qazirgi tańda osy aksıa aıasynda quny 2 mlrd teńge bolatyn 344 joba júzege asyryldy. 2019 jyly kásipkerlerdiń qoldaýymen 218 eldi mekende quny 2 mlrd teńgeden asatyn taǵy 322 joba júzege asyrylatyn bolady dep josparlanyp otyr.
