Elbasynyń jyl saıynǵy Qazaqstan halqyna joldaýynda bergen tapsyrmasyn oryndaýda Aqtóbe oblysynda «Nurly jer» memlekettik baǵdarlamasy aıasynda turǵyn úı zaımynyń alǵashqy jarnasyn 20 paıyzdan 10 paıyzǵa tómendetý úshin turǵyn úı sertıfıkattaryn berýdi bastady.
Materıaldyq qoldaýdy baspana kezeginde turǵan QTQJB salymshylary «Nur Aqtóbe» turǵyn úı alabyndaǵy bir bólmeli páterlerdi satyp alý kezinde paıdalana alady.
7 qarasha, sársenbi kúni Aqtóbe oblysynyń ákimi Berdibek Saparbaev pen «Qazaqstannyń Turǵyn úı qurylys jınaq banki» AQ basqarmasynyń tóraıymy Lázzat Ibragımova QTQJB salymshylaryna turǵyn úı sertıfıkattaryn berý, sonymen qatar, jaldamaly páterdi satyp alý quqyǵymen usynýda seriktes bolý týraly kelisimge qol qoıdy.
- Biz Turǵyn úı qurylys jınaq bankimen Prezıdenttiń halyqty baspanamen qamtamasyz etý týraly tapsyrmasyn oryndaýda belsendi jumys jasap jatyrmyz. Seriktestikke myna derek dálel: búginde banktiń aqtóbelik fılıalynda 90 myń adamnyń depozıti bar, olardyń ishinde 20 myń adam jergilikti atqarýshy organdarda baspana kezeginde turǵandar. Búgin biz birden eki memorandýmǵa qol qoıa otyra ózara qarym qatynasty keńeıtemiz,- dedi oblys ákimi.
Turǵyn úı sertıfıkatyn berý úshin oblys ákimdigi birinshi kezeńde 250 mıllıon teńge bóldi. Bul qarajat banktiń 500-den asa salymshysynyń alǵashqy jarnasyn tómendetýge múmkindik beredi dep kútilýde. Qosa keteıik, «Nur Aqtóbedegi» taza árleýdegi bir bólmeli páterdiń bir sharshy metriniń quny 100 000 – 120 000 teńgeni quraıdy. Páterlerdiń jalpy sharshy metri - 32-54 sharshy metr. Salymshyda baspana qunynyń 10%-y bolý kerek. Alǵashqy jarnanyń qalǵan 10%-yn ákimdik búdjetten beredi. Ony qaryz alýshy bes jyl ishinde aı saıyn 8 250 teńgeden qaıtaratyn bolady. Páter qunynyń qalǵan bóligin Turǵyn úı qurylys jınaq banki jyldyq mólsherlemesi 5%-dyq jeńildetilgen nesıemen usynady.
- Aqtóbe oblysy Prezıdent Joldaýy aıasynda turǵyn úı sertıfıkaty týraly memorandýmǵa búkil óńirdiń ishinde birinshi bolyp qol qoıyp jatyr. Bul aılyǵy tipti 60 myń bolatyn adamdarǵa da baspanaly bolýǵa múmkindik beredi. Ákimdik pen oblys ákimine alǵysymdy bildirgim keledi. Aqtóbe oblysy – belsendi óńirlerdiń biri jáne nesıelik baspanany satyp alýda da respýblıka boıynsha kósh basynda tur,-dep atap ótti Lázzat Ibragımova.
Baǵdarlamaǵa qatysý úshin ótinishter osy jylǵy 6-9 qarasha aralyǵynda Halyqtyq keńse ǵımaratynda qabyldanady. Negizgi krıterıı - jekemenshik quqyǵyndaǵy baspananyń bolmaýy jáne tólem qabiletin rastaý.
