Aqtóbe oblysynyń Kásipkerler palatasy alańynda Sımmental iri qara tuqymynyń respýblıkalyq palatasynyń tanystyrylymy ótti.

Qostanaı oblysynan kelgen áriptester Aqtóbe fermerlerine jańa qaýymdastyqtyń maqsattary men mindetteri týraly aıtyp berdi. Dál osy jerde Palatanyń bas keńsesi ornalasatyn bolady.

Tanystyrylym barysynda Sımmental iri qara tuqymynyń respýblıkalyq palatasynyń quramyna qostanaılyq kásipkerler, ǵalymdar, sonymen qatar mal dárigerleri kirgeni belgili boldy. Palata keńesiniń tóraǵalyǵyna qostanaılyq «Batalınskoe» JSHS jetekshisi Jansart Ahmetov taǵaıyndaldy, dırektory bolyp «Agrogenetıks» JSHS jetekshisi Mark Gýmerov saılandy. Bastamashy toptyń ókilderi qazirgi tańda basqa óńirdegi sharýashylyqtardy aralaýda.

* Mundaı palata respýblıka boıynsha bolǵan joq. Palatany qurý, birinshi kezekte atalǵan iri qara tuqymyn damytýmen, memlekettik qoldaý sharalary aıasynda jetildirýmen baılanysty. Búginde respýblıkalyq regıstr derekteri boıynsha Qazaqstanda 57 bas sımmental iri qara bar. Aqtóbe oblysyndaǵy sharýa qojalyqtarymen jeke sharýashylyqtardy 7 myń bas bar. Qostanaı men Aqtóbe óńirleri sımmentaldyń etti baǵytyn júrgizip otyr. Qazir, ókinishke qaraı oǵan qajetti kóńil bólinbeı keledi. Ázirge eki óńirdiń sharýalaryn biriktirýge bel budyq, – dedi Sımmental iri qara tuqymynyń respýblıkalyq palatasynyń dırektory Mark Gýmerov.

«Alýa» jáne «Jańa turmys» aktóbelik sharýashylyqtardyń basshylyǵy tanystyrylym barysynda jańa birlestikti qoldap, onyń quramyna kirýge ynta bildirdi.

* Bizde túıtkildi máseleler kóp, olardy birigip sheshpese bolmas. Birinshi kezekte, bul sýbsıdıalaý máselesi, óıtkeni sımmental iri qarasy sýbsıdıalaýǵa jatpaıdy. Qazirgi tańda tuqym óndirýshi buqalarǵa ǵana sýbsıdıa qarastyrǵan, biraq onyń da sharttary bar. Ekinshiden, ımportty almastyrý máselesi, bul baǵytta sımmental tuqymy boıynsha asyl tuqymdy –seleksıalyq jumysty jolǵa qoıǵan jón. Sharýashylyǵymyzda «Yrys» baǵdarlamasy arqyly alǵan 100 bas sımmental iri qarasy bar. Bul mal tuqymy óńirimizdiń klımattyq jaǵdaıyna beıimdelgen. Malǵa durys kútim jasalsa etti-sútti baǵytta jaqsy nátıje alýǵa bolady. Qurylatyn palata arqyly jumysymyzdy ońtaılandyramyz degen oıdamyz. Ári sáıkestik qujattaryn tóleýde jeńildik bolady degen úmittemiz, – dedi «Jańa turmys» sharýa qojalyǵynyń basshysy Marat Kýbıev.

Aqtóbe oblysy ÓKP sarapshylary da jańa qurylymǵa qoldaý kórsetýge daıyn ekenderin bildirdi.

Bastamashy top ókilderiniń aıtýynsha, Palatany qurý QR «Asyl tuqymdy mal sharýashylyǵy týraly» Zańyna sáıkes júzege asyrylýda, Zańda ár asyl tuqymdy iri qara mal boıynsha respýblıkalyq palata qurylyp, jumys isteı alady delingen.