Alǵash ret jeltoqsannyń 21 men 22 aralyǵynda Atyraýdaǵy «Munaıshy» stadıonynda áskerı-patrıottyq klýbtar arasynda (10-11 synyp oqýshylary men 1-2 kýrs kolej stýdentteri) «Jas Sarbaz» atty áskerı-sporttyq ıntellektýaldy estafeta ótti dep habarlaıdy Qamshy.kz aqparat agenttigi.
Atalǵan is-sharany Atyraý oblysy Qorǵanys isteri jónindegi departamenti men Atyraý aımaqtyq dene tárbıesi jáne sportty damytý ortalyǵy janyndaǵy Alǵashqy áskerı daıyndyq kabınetimen birlese otyryp uıymdastyrdy. Jarysqa qala men aýdandardan iriktelgen 9 komanda qatysty (shamamen 150 ul-qyzdar).
Komandalarǵa sáttilik tileı kelgen dene tárbıesi jáne sportty damytý ortalyǵynyń dırektory Sádirjan Jekenov osyndaı áskerı-patrıottyq sharalardy uıymdastyrýdyń jastar úshin mańyzy zor deıdi.
«Elimizde áskerı salany damytýǵa, oǵan jastardy tartýǵa jetkilikti kóńil bólinip keledi. Óskeleń urpaqqa otanshyldyq tárbıe berýde, jigerli jastardy tárbıeleýde osy áskerı-patrıottyq klýbtardyń orny erekshe deýge bolady. Sizderge búgingi saıysta sáttilik tileımin. Oblystyq, respýblıkalyq, halyqaralyq saıystarda oblysymyzdyń abyroıyn asqaqtata berińizder», - dedi Sádirjan Jekenov.
Áskerı-sporttyq ıntellektýaldy estafeta komandalyq jáne jekeshe sport túrlerinen ótti.
Estafeta qatysýshylary kelesi jarys túrlerinen saıysqa tústi:
sporttyq (sekirý, jorǵalaý);
ıntellektýaldy (kompúter suraǵyna jaýap berý)
AK-74 avtomatyn bólshekteý jáne jınaqtaý;
alǵashqy medısınalyq kómek kórsetý;
jalpyáskerı qorǵanys kıimi men gaz tumshalaryn kıý.
«İs-sharanyń basty maqsaty – jastar arasynda Qarýly Kúshterindegi áskerı qyzmetti nasıhattaý, áskerı qyzmetke degen qyzyǵýshylyǵyn arttyrý, sondaı-aq óskeleń urpaq arasynda salaýatty ómir saltyn ustaný»,-dep tolyqtyrdy Atyraý oblysynyń QİD baspasóz qyzmeti.
Estafeta qorytyndysy boıynsha birinshi oryndy ıelengen Jylyoı aýdanynan «Namys» klýby. Sondaı-aq, úshtikke ilingen jeńimpazdar qataryna Atyraý qalasy №27 mektebiniń «Sarbaz» komandasy men Isataı aýdanynan «Qorǵanys» komandasy. Jeńimpazdarǵa kýbok tapsyrylyp, árbir oıynshy medal jáne gramotalarmen marapattaldy.
