Asqazan tusyna temir tyǵyp, ózderin óltirmek bolǵan sottalýshylardyń ómirine qaýip joq. Almaty oblysynyń Zarechnyı aýylyndaǵy La155/12 túzetý mekemesiniń basshylary bolǵan oqys oqıǵanyń sebebin túsindirip, tilshilerdi túrmeniń ishki tynys-tirshiligimen tanystyrdy. Túrme basshylary ózderine qol jumsaǵan úsh sottalýshynyń álimjettikke bola osyndaı áreketke bardyq degeni qaýeset deıdi. Olar kún sýyqta qystyq kıimniń berilmegenine qarsylyq bildirgen dep habarlaıdy Qamshy.kz aqparat agenttigi «Almaty» telearnasynyń deregin negizge alyp.
«Urdy, mazaq qyldy, namysqa tıdi jáne bul atalǵan mekeme qyzmetkerleriniń abyroıy. Meniń ólimime La155/12 mekemesiniń ákimshilgi kináli» - degen sózderdi keýdelerine kesip jazyp, ony taratyp úlgergen sottalýshylar qazir Qapshaǵaı qalalyq aýrýhanasynda jatyr. Túrmedegi álimjettikke shydamaı, ózimizdi óltirmekshi boldyq degen Dmıtrıı Artúshenko, Jánibek Baıbosyn men Dáýren Rysqannyń áreketi 16 jeltoqsan kúni kúndiz oryn alǵan.
«Túrmeniń ákimshiligi sottalýshylardy urady. Sondyqtan men prokýratýraǵa, polısıaǵa birneshe ret aryz jazǵanmyn. Biraq eshqandaı shara qoldanbaǵandyqtan meniń azamattyq nekedegi kúıeýim osyndaı aýyr áreketke baryp otyr», - deıdi sottalýshy D.Artúshenkonyń azamattyq nekedegi jubaıy Ksenıa.
Qazir tyıym salynǵan zattardyń qapastaǵylardyń qolyna qalaı túskeni anyqtalyp jatyr. Al túrme basshylarynyń málimetinshe, uryp-soǵý, kúsh kórsetý syndy álimjettik mekeme qabyrǵasynda buǵan deıin múldem bolmaǵan. Sottalýshylar soraqy áreketke tek qystyq jyly kıimniń berilmeýine bola bardy deıdi túrme qyzmetkerleri.
«Olarǵa eski qystyq kıimder berilgen. Óıtkeni syrt kıimderi tozbaǵandyqtan biz jańasyn bere almaımyz. Jalpy, sottalýshylarǵa kıimniń jetispeýshiligi bar. Ol problema qazir sheshilip jatyr», - deıdi Almaty oblysy boıynsha Qylmystyq atqarý júıesi departamenti LA155/12 mekemesi basshysynyń mindetin ýaqytsha atqarýshy Alekseı ORISHENKO.
Adam óltirip, 16 jylǵa sottalǵan jigittiń biri – Maqsat Turǵanjanuly. Ol jazasynyń 8 jylyn ótegen.
«Eldegi talaı túrmeniń temirinen telmirip qaradym. Úıim Talǵardyń Tuzdybastaý aýylynda. Anam men eki balam kútip otyr. Bólme jyly, taza. Tek túrme ákimshiligi tynyshtyq berse, basqasyna tózemiz ǵoı», deıdi ol.
Jazasynyń áli jartysy qalǵan jigittiń aıtýynsha, túrmedegi taǵy bir problema – tamaq sapasynyń tym nasharlyǵy. Aıtýynsha, týystary úılerinen ákelgen tamaq ózderine tolyq tımeıtin kórinedi.
«Bári nashar. Tamaqty az beredi. Uryp-soǵý, júgirtý degen zańda joq qoı. Barlyǵy zań aıasynda júrgizilse deımiz. Minezimiz sáıkes kelmeı qalady, eregisip qalamyz, tóbelesip qalamyz. Ondaı jaǵdaılar bop turady. Ondaı túrme túgili, bostandyqta da bolady emes pe?», - deıdi jazasyn óteýshi Maqsat HAPIZOV.
«Tamaq berýi rasymen de úlken problema. Maǵan bul jerdiń tamaqtandyrýy múldem unamaıdy. Árıne, bul jer demalys orny emes. Biraq jalǵa alýshylardy aýystyrý máselesimen aınalysyp jatyrmyz. Óıtkeni, táýligine bir sottalýshyǵa 680 teńgeniń tamaǵy beriledi. Alaıda, ol tıisti deńgeıde oryndalmaıdy», - deıdi Qamaýǵa alynǵandardyń quqyqtaryn qorǵaý máseleleri boıynsha koalısıasynyń quqyq qorǵaýshysy Marıanna GÝRINA.
Aýyr jaza arqalaǵandar túzetý mekemesiniń osydan 2 aı buryn taǵaıyndalǵan jańa basshysy jaǵdaıdy jaqsartar degen úmitte. Al 6 dıametrlik temirdi asqazandaryna tyqqan jigitterdiń jaǵdaıy qazir qalypty. Jalpy, Almaty oblysynda alty túrme bolsa, solardyń tórteýi osy Zarechnyı aýylynda ornalasqan. Al 1500 adamǵa arnalyp salynǵan LA155/12 mekemesinde qazir 846 sottalýshy jazasyn ótep jatyr. Olardyń 173-i túrme ishinde jumys isteıdi. Jalpy, Almaty oblysynda 3200-den astam adam jazasyn ótep jatyr. Bıyl ártúrli sebeptermen 7 sottalýshy kóz jumǵan.
