Aqtóbe oblysy sybaılas jemqorlyq deńgeıi eń tómen óńirlerdiń úshtigine kiredi.
Aqtóbe oblysy sybaılas jemqorlyq deńgeıi eń tómen óńirlerdiń úshtigine kiredi. Bul týraly QR memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev óńirge jumys saparymen kelgen kezinde málimdedi. Alık Shpekbaevtyń qatysýymen oblys aktıviniń otyrysy ótti. Sharany ashqan oblys ákimi Berdibek Saparbaev sońǵy jyldary Elbasy Nursultan Nazarbaevtyń tapsyrmasymen óńirdegi sybaılas jemqorlyqpen kúres aıtarlyqtaı jandandyrylǵanyn atap ótti.
- Sybaılas jemqorlyqty túp tamyrymen joıý – Prezıdenttiń negizgi tapsyrmalarynyń biri. Elbasy osy jaǵymsyz qubylysqa «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda da nazar aýdardy. Biz sybaılas jemqorlyqqa qarsy kúreste turǵyndar úshin elektrondy qyzmetterdiń aýqymyn keńeıtýge jáne qoljetimdiligin arttyrýǵa daıynbyz, - dedi oblys ákimi.
Óz kezeginde Alık Shpekbaev Aqtóbe oblysy sybaılas jemqorlyq deńgeıi eń tómen óńirlerdiń úshtigine kiretinin atap ótti.
- Elektrondy memlekettik qyzmetterdi damytý turmystyq sybaılys jemqorlyqty tamyrymen joıýǵa aıtarlyqtaı áser etedi. Byltyr Aqtóbe oblysynda memlekettik qyzmetterdiń nebári 22%-y elektrondy formatta kórsetilse, búginde jergilikti atqarýshy organdar bul kórsetkishti 82%-ǵa deıin, ıaǵnı nebári bir jyldyń ishinde tórt esege kóterdi. Jaqynda Aqtóbedegi «Halyqtyq keńsede» boldym. Barlyq qyzmetti bir jerge jınaǵan, azamattar eshqaıda shyqpaı-aq, barlyq qyjetti bir orynda ala alady. Sizdiń oblystaǵy elektrondy memlekettik qyzmetterdi damytýǵa jaýapty adamdar qurmet pen maqtaýǵa laıyq,- dedi Alık Shpekbaev.
Jalpy, Agenttik tóraǵasynyń aıtýynsha, elektrondyq úkimetti damytý reıtıńinde BUU deńgeıi joǵary qyryq eldiń qataryna engen. Reıtıńke barlyǵy 193 memleket kirdi. Ol sondaı-aq, Aqtóbedegi birneshe áleýmettik jáne óndiristik nysandardy aralaǵannan alǵan áserimen bólisti.
- Sońǵy úsh jyldyń ishinde Aqtóbede Taldyqorǵandaı shaǵyn oblys ortalyǵy salyndy deýge bolady. Osynyń ózi kóp nárseni aıtady. Keıbireýler baıqamaýy da múmkin, biraq men salynǵan áleýmettik nysandardy kórip sanynan jańyldym,-dedi Alık Shpekbaev.
Oblys aktıviniń kezdesýi Berdibek Saparbaev pen Alık Shpekbaevtyń "Astana - adaldyq alańy" jobasynyń balamasy - «Aqtóbe – adaldyq alańy» jobalyq keńsesiniń jarǵysyna qol qoıýymen aıaqtaldy.
Jobalyq keńse oblys ákimdigi men memlekettik qyzmet isteri jáne sybaılas jemqorlyqqa qarsy kúres departamenti qyzmetkerlerinen quralǵan. Basty maqsaty – turmystyq sybaılas jemqorlyqty qysqartý, sybaılas jemqorlyq qaterin azaıtý, memlekettik qyzmet sapasy men halyqtyń memlekettik apparatqa degen senimin arttyrý.
«Úsh jyldyń ishinde kóp ózgeris bolǵan. «Astanada sońǵy 5 jylda bir Pavlodar salyndy» dep aıtady. Aqtóbede úsh jyldyń ishinde kishi oblys ortalyǵy salyndy. «Nur Aqtóbe», «Batys», «Batys — 2» shaǵyn aýdandaryn qosqanda 130 myńnan astam turǵyn bar eken. Jekemenshik úılerdiń qurylysy da kóp. Qurylys sánine qarap, jergilikti turǵyndardyń jaǵdaıy joǵary dep aıtýǵa bolady», — dedi Alık Shpekbaev.
Búgingi tańda halyqqa qyzmet kórsetý ortalyǵyndaǵy qyzmetalýshylarǵa jasalǵan yńǵaıly, ári qolaıly jaǵdaı turǵyndardyń oń pikirin qalyptastyrýda.
Sondaı-aq agenttik tóraǵasy A.Shpekbaev Aqtóbe oblysynda memlekettik baǵdarlama aıasynda azamattardy turǵyn úımen qamtamasyz etý sharasymen tanysty. Osy memlekettik baǵdarlama aıasynda salynǵan jańa turǵyn úı nysandaryn aralap, Jedel járdem medısınalyq stansasy men Muz aıdyny sıaqty áleýmettik nysandarǵa bardy.
Alǵashqy kúngi jumys saparyn qorytyndylaı kele, A.Shpekbaev M.Ospanov atyndaǵy Batys Qazaqstan memlekettik medısına ýnıversıteti stýdentteriniń turmystyq jaǵdaıymen tanysty.
Aıta keteıik, keńse mamandary birinshi basshylardyń derbes jaýapkershilikterin kúsheıtetin qujat ázirlegen. Oǵan qala men aýdandardyń ákimderi, jergilikti atqarýshy organdar men ortalyq memlekettik organdardyń aýmaqtyq bólimsheleriniń basshylary syndy 259 memlekettik qyzmetker qol qoıǵan. Jobalyq keńseniń taǵy bir jetistigi – «bir tereze» qaǵıdasymen mıgrasıalyq qyzmetter kórsetý bolyp tabylady. Bul belgili bir qyzmetterdi kórsetý merzimin bes jumys kúninen eki saǵatqa deıin qysqartýǵa múmkindik berdi.
