Aqtóbede Halyqaralyq sybaılas jemqorlyqpen kúres kúnine arnalǵan saltanatty shara ótti.
Oǵan QR memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev, oblys ákimi Berdibek Saparbaev, QR Prezıdenti janyndaǵy memlekettik basqarma akademıasynyń rektory Fatıma Jaqypova, memlekettik, bank mekemeleri men qoǵamdyq qyzmet kórsetý qyzmetkerleriniń salalyq kásipodaq tóraǵasy Merbolat Jaqypov, oblystyq memlekettik jáne quqyqqorǵaý organdarynyń basshylary, arnaıy baqylaý toptarynyń músheleri men qoǵam ókilderi qatysty.
- Táýelsizdik alǵan kúnnen bastap memleket basshysy sybaılas jemqorlyqty tamyrymen joıýdyń josparly saıasatyn júrgizip jatyr. Sońǵy jyldary turmystyq sybaılas jemqorlyqty joıý úshin memlekettik qyzmetterdiń deni elektrondy formatta júrgizilýde. Aqtóbede osy maqsatta halyqqa qyzmet kórsetý ortalyqtary jumys jasaıdy, kóshi-qon qyzmetteri ortalyǵy men bir jyldan astam ýaqyt buryn azamattar 600-den astam memlekettik qyzmet túrlerin ala alatyn «Halyqtyq keńse» ashyldy. Bıyldan bastap «Halyqtyq keńse» 350 myńnan asa adamǵa qyzmet kórsetti. Bizdiń basty mindetimiz – Prezıdenttiń sybaılas jemqorlyqty tamyrymen joıý boıynsha barlyq tapsyrmasyn sapaly oryndaý, sol úshin memlekettik organdar men azamattyq qoǵam birlese jumys isteýleri kerek. Sonymen birge, balalardy sybaılas jemqorlyqqa qarsy tárbıeleýge erekshe kóńil bólgen mańyzdy,- dedi oblys ákimi Berdibek Saparbaev sálemdesý sózinde.
«Sybaılas jemqorlyqty túp tamyrymen joıý - Prezıdenttiń negizgi tapsyrmalarynyń biri. Elbasy osy jaǵymsyz qubylysqa «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan halqyna Joldaýynda da nazar aýdardy. Biz sybaılas jemqorlyqqa qarsy kúreste turǵyndar úshin elektrondy qyzmetterdiń aýqymyn keńeıtýge jáne qoljetimdiligin arttyrýǵa daıynbyz», - dedi oblys ákimi.
Alık Shpekbaev Aqtóbe oblysy sybaılas jemqorlyq deńgeıi eń tómen óńirlerdiń úshtigine kiretinin atap ótti.
Óz kezeginde Alık Shpekbaev Aqtóbe oblysyndaǵy antıkorrýpsıalyq jumystyń uıymdastyrylý deńgeıine joǵary baǵasyn berdi.
- Biz oblys ákimimen birge «Aqtóbe – adaldyq alańy» jobalyq keńsesiniń ashylýyna qatysyp, jarǵysyna qol qoıdyq. Onyń basty maqsaty – turmystyq sybaılas jemqorlyqty túbegeıli tamyrymen joıý. Bul bolashaǵy zor joba jáne men ony sapaly júzege asyrý úshin memlekettik organdarmen qatar, qoǵam ókilderi de belsendi túrde qatysady dep senemin. Jalpy, eki kúndik jumys saparymnyń qorytyndysynda Aqtóbe oblysyndaǵy antıkorrýpsıalyq qyzmet júıeli jáne keshendi sıpatqa ıe dep aıta alamyn. Buǵan bıylǵy jyldyń 11 aıynyń nátıjesi boıynsha oblystaǵy sybaılas jemqorlyq deńgeıi elimiz boıynsha eń tómen ekendigi dálel, - dedi agenttik basshysy. Sharanyń jalǵasynda B.Saparbaev pen A.Shpekbaev oblystaǵy antıkorrýpsıalyq mádenıetti qalyptastyrýǵa súbeli úles qosqan aqtóbelikterdi alǵys hattarmen marapattady.
Sondaı-aq, «Adal jol» marafon-estafetasy men jýrnalıser arasyndaǵy «Úzdik antıkorrýpsıalyq materıal» oblystyq baıqaýy qorytyndylandy. Túrli atalymdar boıynsha «Qazaqparat» HAA tilshisi Samal Endibaeva, «Habar-24» telearnasynyń tilshisi Aqsáýle Báımenshına, «Aqtóbe» gazetiniń tilshisi Aıraılym Nurbaeva, «Bnews» aqparattyq saıtynyń tilshisi Baıan Saǵymbaeva jeńimpaz atandy. Memlekettik qyzmet isteri jáne sybaılas jemqorlyqqa qarsy is-qımyl agenttigi departamentiniń úzdik qalalyq, aýdandyq ákim appparatyn anyqtaıtyn basqa baıqaýynda Qobda, Baıǵanın jáne Temir aýdandary júldeli oryndarǵa ıe boldy.
Jobalyq keńse oblys ákimdigi men memlekettik qyzmet isteri jáne sybaılas jemqorlyqqa qarsy kúres departamenti qyzmetkerlerinen quralǵan. Basty maqsaty - turmystyq sybaılas jemqorlyqty qysqartý, sybaılas jemqorlyq qaterin azaıtý, memlekettik qyzmet sapasy men halyqtyń memlekettik apparatqa degen senimin arttyrý.
Aıta keteıik, keńse mamandary birinshi basshylardyń derbes jaýapkershilikterin kúsheıtetin qujat ázirlegen. Oǵan qala men aýdandardyń ákimderi, jergilikti atqarýshy organdar men ortalyq memlekettik organdardyń aýmaqtyq bólimsheleriniń basshylary syndy 259 memlekettik qyzmetker qol qoıǵan.
Jobalyq keńseniń taǵy bir jetistigi - «bir tereze» qaǵıdasymen mıgrasıalyq qyzmetter kórsetý bolyp tabylady. Bul belgili bir qyzmetterdi kórsetý merzimin bes jumys kúninen eki saǵatqa deıin qysqartýǵa múmkindik berdi.
