Indonezıadaǵy sýnamıdiń saldarynan qaza tapqandardyń sany 281-ge jetti. Bul týraly Straits Times basylymy habarlady.
Al zardap shekkender 1016-ǵa, iz-tússiz joǵalǵandar 57-ge jetti.
Sýnamı tolqyny ótken senbide jergilikti ýaqytpen sanaǵanda saǵat 21.27-de Indonezıanyń batysyndaǵy Zond buǵazynyń jaǵalaýynda oryn aldy. Júzdegen úı men ǵımarat sý astynda qaldy.
Sýnamıden qıraǵan úı
Memleket bıliginiń habarlaýynsha, tolqyn Anak-Krakataý janartaýynyń atqylaýy saldarynan kóterilýi múmkin. Al Indonezıada ázirge sýnamı jaıly aldyn-ala eskertý júıesi qarastyrylmaǵan.
Indonezıanyń geologıalyq qyzmeti tabıǵat apatynyń 2 mınýt 12 sekýndqa sozylǵanyn habarlady. Sonymen qatar halyqtyń krater mańyna 2 shaqyrymǵa deıin jaqyndamaýyn talap etti.
Áleýmettik jelide tolqynnyń Seventeen rok-grýppasy án aıtyp turǵan sahnany shaıyp ketkeni týraly vıdeosy taralyp jatyr. Keıin top ánshisi basıst, gıtarashy jáne toptyń menedjeri qaza tapqanyn habarlady, al taǵy eki adam men biriniń áıeli joǵalyp ketken.
Sýnamıden qatty zardap shekkenderdiń - biri Banten provınsıasyndaǵy Pandeglang okrýgi. Dál osy aýdanda qalanyń ulttyq saıabaǵy men demalys oryndary ornalasqan.
Qutqarýshylar qazir Anak-Krakataý janartaýy men sýnamı arasyndaǵy baılanysty zerttep jatyr.
Sýnamıden qashqan halyq meshitterdi panalady
Janartaý sońǵy ret 2018 jyldyń maýsymynda atqylaǵan eken.
Alǵashynda jaı ǵana sýasty janartaýy bolǵan Anak-Krakataý jıi belsendiliginiń arqasynda aınalasyna jańa bir aral qalyptastyrdy. Janartaý teńizden 300 metr bıikte ornalasqan.
Anak-Krakataý janartaýy, foto shildede túsirilgen
Anak-Krakataý janartaýy, fotony ótken senbide Oısteın Lýnd túsirgen
1883 jyly janartaý atqylaǵanda kúl baǵany 20 shaqyrymǵa deıin jetip, kúrkiregen daýysy Avstralıadan Mavrıkıaǵa deıin estilgen.
Indonezıada sýnamı jıi bolyp turady. Eske sala ketsek, 2018 jyldyń qyrkúıeginde Sýlavesı aralyndaǵy jer silkinisi, odan keıin sýnamıge ulasqan apattan eki myńǵa jýyq adam qaza tapqan.
Sýnamı tolqyny úılerdi qıratyp, kólikterdi aýdardy
2004 jyldyń jeltoqsanynda Úndi muhıty jaǵalaýynda bolǵan jer silkinisiniń saldarynan 228 myń adam qaza tapqan, soqqy Indonezıaǵa da aýyr tıdi.
