Búgin Qazaqstan Respýblıkasy Parlamenti Májilisiniń Depýtaty Á.E. Bekturǵanovtyń tóraǵalyǵymen «Nur Otan» partıasy Saılaýaldy baǵdarlamasynyń «Bilim berý» baǵyty boıynsha Partıalyq kýrator komısıasynyń otyrysy ótti.
Kún tártibinde «Pedagog mártebesi týraly» jáne «Oqýshy men muǵalimge oqý júktemesin tómendetý máseleleri boıynsha» QR Zańdarynyń jobalary talqylandy.
Elbasy N.Á. Nazarbaev 2018 jyldyń 5 qazanynda «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda kelesi jyly muǵalimder men mektepke deıingi mekemeler qyzmetkerleri úshin barlyq ıgilikti qarastyryp, júktemeni azaıtýǵa, jónsiz tekserister men mindetten tys fýnksıalardan arashalaýǵa baǵyttalǵan «Pedagog mártebesi týraly» zańdy ázirlep, qabyldaý týraly tapsyrma bergen bolatyn. Sodan beri bul másele halyq arasynda qyzý talqylanyp jatyr.
Elimizde oqýshylardyń oqý júktemesi máselesi eń ózekti máselelerdiń biri bolyp turǵany jasyryn emes. Prezıdent atap ótkendeı, Qazaqstandaǵy oqýshylardyń oqý júktemesi TMD elderiniń ishinde eń joǵary, EYDU (OESR) memleketterinen 30 paıyzdan astam joǵary eken.
Al, muǵalimderge óz mindetterinen basqa da fýnksıalardy júkteý máselesi tipti ózekti bolyp keledi. Atalǵan zań jobalary qoǵamda keń talqylanyp, osy máselelerdi sheshýge, barlyq múddeli taraptardyń quqyqtaryn qorǵaýǵa baǵyttalýy tıis.
Otyrysqa jınalǵandar Prezıdenttiń Joldaýda bergen tapsyrmalaryna sáıkes, aldaǵy 5 jyl ishinde bilim berý, ǵylym jáne densaýlyq saqtaý salasyna shyǵyndardy jalpy ishki ónimniń 10 paıyzyna deıin jetkizý josparlanǵanyn, sonymen qatar, mektepke deıingi bilim berý sapasyn jaqsartý, biliktilik talaptaryn, oqytý ádisin, tárbıeshilerdiń jáne balabaqshadaǵy basqa da qyzmetkerlerdiń eńbegine aqy tóleý júıesin qaıta qaraý qajet ekendigin atap aıtty.
- Bul ustazdardyń kópten kútken jobasy. Aqpan aıyna deıin bul jobany talqylaýǵa kóp ýaqytymyz bar. «Kelisip pishken ton kelte bolmas» degen sóz bar qazaqta, sondyqtan, ár nárseni kelise otyryp túıinin shyǵaramyz dep oılaımyn. Atalmysh zań jobasy áleýmettik jelilerde de keńinen talqylanyp jatyr eken. Bul halyqtyń beı-jaı emestigin tanytady, qýanarlyq jaǵdaı. Jergilikti atqarýshy organ muǵalimderge premıany jáne aýyldyq jerde jumys istegeni úshin otyn alýǵa qarajattyń somasyn belgileıdi degenge keliskisi kelmeıtinder bar. Jergilikti jerlerdegi ákim óziniń ustazy men dárigerine jany ashymasa neǵyp otyr? Osy máseleni ákimder de durystap qaraý kerek,- dedi Parlament Májilisiniń depýtaty Baqytgúl Hamenova
Kezdesý barysynda ózekti máselelerdi sapaly talqylaý úshin QR Bilim jáne ǵylym vıse-mınıstri E.A. Sýhanberdıeva zań jobalaryn ázirleý boıynsha júrgizilip jatqan jumystar týraly baıandama jasap, QR Parlament Májilisiniń depýtattary J.N. Nurmanbetova, N.V. Jumadildaevalar atalǵan Zań jobalaryna qatysty óz usynystary týraly baıandama jasady. Vıdeokonferens baılanys arqyly elimizdiń barlyq aımaqtary qatysqan otyrys qorytyndysy boıynsha Komısıa músheleri ýákiletti memlekettik organdarǵa jiberiletin usynystar ázirledi.
