Sorapsyz sózder shaıqaıdy sabyr sabasyn,
İnige izet, izdegen aqyn aǵasyn.
– Shyraǵym,- deımin, -shyjǵyryp aıtsań shyndyqty,
Úkimet túgil, úı ishine qalaı jaǵasyń?

Syńsıdy úmit sorqumǵa burǵan jylǵasha,
Qaıtemiz endi bermesin bılik buldasa.
Aqkóńil jandar alalamaıdy eshkimdi,
Qara tizimdi qaranıetter qurmasa.

Arymyz týlaq bolmaýy úshin taqymda,
Aıtamyz áli aqıqat-shyndyq haqynda.
Aılańkes pıǵyl aq úıdiń qara tizimi,
Atańnyń quny ketti me mendeı aqynda!

Qoǵamnyń mynaý ý-zárin kimder ishpegen,
Qaraýlyǵyna qaınap ketedi ish degen.
Qaı zamanda da qylysh til qaıran aqyndar,
Han saraıynyń qara tiziminen túspegen.

Otyz segizde obasha qyrǵan Alashty,
Qara tizimniń qyr-syryn tarıh jańa ashty.
Qysyr bılikpen qyryq jyl qyrbaı bop ótken,
Ótejandardyń muńymen kimder sanasty?

Kórgendi jazyp, óleń óremiz tún qatyp,
Kóz jasyn halyq bolǵan joq áli qurǵatyp.
Qazaqty aldap, tonaýmen bolǵan bıliktiń,
Qara tiziminde bolýdyń ózi – bir baqyt.

Temirǵalı Kópbaı