Almatyda Denıs Tenniń ólimine qatysty sot otyrysy jalǵasyp jatyr. Oqıǵa ornyna birinshi kelgen polıseıler sot zalynda sóıledi, dep jazady Qamshy.kz aqparat agenttigi.

Kýáger retinde kelgen polısıa qyzmetkeri Erkinbek Erdos Erkinbekuly oqıǵanyń qalaı bolǵanyn baıandap berdi. Ol - Túrksib aýdandyq polısıa bóliminiń jol-patrýl polısıasynyń vzvod komandıri.  Aıtýynsha, sol sátte Masanchı kóshesindegi aýdanda bolǵan eken. Al tóbeles Qurmanǵazy jáne Báıseıitov kóshelerinde oryn alǵan.

«Sol kúni tańnan beri Masanchı kóshesindegi aýdannyń qoǵamdyq tártibine jaýap berý úshin jumysqa shyqtym. "Shevchenko-Báıseıitov kóshesinde pyshaq jaraqaty boldy" degen habar aldym da, birden soǵan qaraı júıtkidim. Ol jerge Qabanbaı batyr men Abylaı han kósheleri arqyly bardym, tez jetý úshin jol erejesin buzýyma týra keldi», - dedi ol.

Aıtýynsha, oqıǵa ornyna Abylaıhan kóshesi arqyly kelgende, kámelet jasqa tolmaǵandardyń isimen aınalysatyn ınspeksıa qyzmetkerin kórgen. Ol bireýdiń artynan qýyp júrdi.

«Ol maǵan qol bulǵap, jol kórsetti. Men toqtap, onda eshkimniń joq ekenin aıttym. Ol meniń kóligime otyryp, oqıǵa ornyna jettik. Jolda maǵan kúdiktilerdiń qandaı kıimde bolǵanyn túsindirdi. Onyń aıtqandaryn rasıa arqyly habarlap otyrdym», - dedi polıseı sot zalynda.

Polısıa ókilderi rasıa arqyly habar alǵannan keıin oqıǵa ornyna 4-6 mınýttan soń jetken eken.

-«Ol jerde 5-6 adam turdy. Zardap shegýshi jerde qansyrap jatty. Alaıda teris qarap jatqandyqtan alǵashynda kim ekenin bile almadym. Jaraqatynyń aınalasy fýtbolkamen baılanǵan eken. Adamdardan dári qobdıshasyn suradym. Jedel járdem kelgenshe, alǵashqy kómek kórsetkim keldi. 10-12 mınýttan soń jedel járdem keldi. Rasıa arqyly olardyń tez kelýin eki-úsh ret qaıtalap aıttym», - dep qostady sózin.

Sonymen qatar, sot zalyna ekinshi kýáger polıseı Serjan Adalbaı keldi. Ol -  Almaly aýdandyq polısıa bóliminiń jol-patrýl polısıasynyń qyzmetkeri. Ol oqıǵa ornyna rasıa arqyly habar alǵan soń 10 mınýttan keıin kelgen.

♦Eki polıseı óz paryzyn adal atqarǵanda, Denıs Ten tiri qalar ma edi?!

-«Saǵat shamamen 14.30-da Baıseıitov-Qurmanǵazy kósheleriniń qıylysynda "pyshaq jaraqatymen bolǵan tóbeles boldy" degen habar aldym." Jaqyn aýdandaǵy polıseılerdiń bárine sonda barsyn" degen buıryq tústi. Men ol kezde Muqanov-Qurmanǵazy kóshesinde bolǵanmyn. Oqıǵa ornyna 10 mınýtta jettim. Adamdar zardap shegýshini qorshap alǵan. Kafe qyzmetkerleri spırt ákelip, jaraqat ornyna jaqty. Jedel járdem 4 mınýttan soń keldi. Jaqyn mańda avto áınekterge toly sómke jatty. Sómke terezesi alynǵan Lexus kóliginiń janynda jatyr eken. Kólikti de qorshaýǵa aldyq», - dedi kýáger-polıseı.

-«Men barǵanda vzvod komandıri Erkinbek te sonda boldy. Qalǵandary keıin keldi. Zardap shegýshi essiz jatty. Kýágerdiń biri «jas jigitterdiń tóbelesip jatqanyn» kórgenin aıtty. Keıin polısıa shaqyrǵan. Basty kýáger balalar alańynda basqa da kýágerlerdiń bolǵanyn aıtty. Alaıda, olardy tappadyq. Oqıǵa ornynan tek bir kýágerden túsinikteme aldyq», - dedi polıseı.  

♦"Denıs Tendi tapsyryspen óltirgen bolýy múmkin"

Eldiń maqtanyshy, qazaqstandyq fıgýrıst Denıs Ten 2018 jyldyń 19 shildesinde qaıtys boldy. Denıs óziniń kóligindegi aınany urlamaq bolǵan eki uryny baıqap qalady. Ustamaq bolǵanda, olardyń biri sanyna pyshaq salyp jiberedi. Kóp qan joǵaltqan Denıs Ten aýrýhanada qaıtys boldy. Denıstiń jasy nebári 25-te edi.

♦"Men urlyq jasamadym, Denıs Tendi óltirmedim" (foto)

Fıgýrıstiń isi boıynsha búginde úsh kúdikti anyqtalyp otyr: Olar - Arman Qudaıbergen, Nuraly Qıasov jáne Janar Tolybaeva.