18 jastaǵy Rahaf Mogomed ál-Kýnýn Islam dininen bas tartqan. Ol óz eline oralǵysy joq, sebebi  otbasy men týysqandarynan qorqady dep jazady Qamshy.kz aqparat agenttigi sheteldik BAQ-tyń deregin negizge alyp.  Eger elge qaıtatyn bolsa, ony ólim jazasy kútip turǵanyn málimdep, taılandtyq shekarashylardy sendirdi.

Rahaf Kýveıtte óziniń otbasymen birge demalyp júredi. Alaıda ol osy demalysty paıdalanyp, Avstralıaǵa qashyp ketpekshi bolǵan. Kýveıttegi demalysqa barmas buryn Rahaf avstralıalyq vızany alyp qoıǵan. Kýveıtten Taıland arqyly Avstralıaǵa qashyp ketýdi josparlady. Alaıda Taılandqa kelgen kezde Saýd Arabıa elshiliginiń qyzmetkeri Rahaftyń tólqujatyn aldap tartyp alady. Keıin álgi qyzmetker Rahafqa bul sapardy jalǵastyrýǵa ata-anasy qarsy ekenin, Kýveıtke qaıtý kerektigin aıtqan. Osy kezde Rahaf sheteldik jýrnalıserge habarlasqan.

Araǵa biraz ýaqyt salyp Taıland bıligi kelissóz ótkizip, 18 jastaǵy qyzdy týǵan eline jibermeıtinin habarlady. Keıin Rahaf BUU-nyń bosqyndar isi jónindegi agenttik ókilderimen birge aeroporttan ketip qalady. 

BBC gazetine bergen suhbatynda Rahaf ıslam dininen bas tartqanyn, eger úıge oralsa, ony tek ólim kútip turǵanyn aıtyp, kómek suraıdy. Aıta ketsek, Saýd Arabıasynda ıslam dininen bas tartý ólimmen jazalanýy múmkin.

-«Olar meni óltiredi. Meniń ómirim - qyl ústinde. Ata-anam meni óz qolymen óltirýge daıyn. Meniń oqyǵanymdy qalamaıdy, óltiretinin aıtyp, qorqytyp jatyr. Ata-anam kólik júrgizýge de, saıahattaýǵa da tyıym saldy. Men qarapaıym adamdar sekildi óz qalaýymsha ómir súrgim keledi. Óz ómirimdi, jumysymdy jaqsy kóremin. Biraq meniń otbasym maǵan kún bermeı keledi»,— deıdi Rahaf.

Sondaı-aq 18 jastaǵy Rahaf Kanada, AQSH, Avstralıa jáne Ulybrıtanıa elderinen bosqyn mártebesin berýdi surady.

Human Rights Watch uıymynyń málimetinshe, Taılandtyń zańgerleri Rahafty deportasıalaýǵa tyıym salýdy surap, aryz jazǵan.