Qazaqstannyń Sırıadan áıelder men balalardy elge qaıtarýǵa qatysty gýmanıtarlyq operasıasy sátti aıaqtaldy dep habarlaıdy Qamshy.kz aqparat agenttigi.  

"Meniń tikeleı tapsyrmam arqyly 6 qańtarda quqyq qorǵaý organdary men QR SİM-men birge úlken gýmanıtarlyq operasıa sátti aıaqtaldy. Sırıadan Qazaqstannyń 47 azamaty, onyń ishinde 30 bala Qazaqstanǵa qaıtaryldy. Olardy túrli jaǵdaımen aldap, daǵdarys bolyp jatqan Sırıaǵa alyp ketken. Bul jóninde buryn da aıtqan bolatynbyz. Kópshiligi sol jerdegi soǵystyń kesirinen qaıtys boldy. Biz birneshe dostyq qarym-qatynastaǵy memleketter arqyly kepilge alynǵan qazaqstandyqtardy ushaqpen alyp keldik. Olardyń medısınalyq kómek alýyna biz qoldaý kórsetetin bolamyz. Taǵdyr taýqymetin tartqan qazaqstandyqtardyń qýanyshynda shek joq. Olardyń qýanyshty kóz jasyn kórdik. Bul olarǵa da, basqa qazaqstandyqtarǵa da sabaq bolady dep oılaımyn. Biz qazaqstandyqtar qaı jerde júrse de qoldaý bildiretinin kórsetip otyrmyz. Memlekettiń tutastyǵyn qamtamasyz etip, beıbitshilikti saqtaý basty mindet. Sondyqtan qaqtyǵys aımaǵynda eriksiz júrgen qazaqstandyqtardy elge qaıtarý jumystaryn biz jalǵastyratyn bolamyz", - dedi Elbasy óz málimdemesinde.