Aqyn Astana qalalyq sotyna sottalýshy Muhıtovaǵa qatysty taǵy hat jiberdi. Bul joly da hatynda boıjetkendi bas bostandyǵynan aıyrmaı-aq jazalaýdy ótinipti, dep jazady Qamshy.kz aqparat agenttigi.

Súleımenovtiń hatyn appelásıalyq sot otyrysynda sýdıa Ásem Ramazanova oqydy.

«22 maýsymdaǵy qaıǵyly jaǵdaıdan beri jarty jyldaı ýaqyt ótti. Uzaqqa sozylǵan sot prosesi onsyz da qaıǵydan qan jutyp otyrǵan jandardyń yǵyryn shyǵardy. Eskendirdiń ata-anasy men ájeleriniń jaǵdaıyn menen artyq túsinetin eshkim joq. Ásirese qyzym - Láılá. Ár sot prosesi oǵan psıhologıalyq turǵydan qysymyn kórsetip keledi. Muhıtova alǵashynda kinásin túsingendeı bolyp ókinip edi, keıin advokat Kýrıchenko marqumnyń ózin kináli etip shyǵarǵysy keldi. Ol úshin Ombydan arnaıy sarapshy shaqyrtyp, motosıkldiń joǵary jyldamdyǵyn dáleldeýge tyrysty. 3 qańtarda ótken sot otyrysynda advokat jańa sarapshylar daıyndaǵan tyń derekterdi usyndy. Jasyl tústen óz jolaǵymen ótip bara jatqan motosıkldiń qaýipti ári qaýipsiz jyldamdyǵy týraly aıtyp berdi», - dep jazdy Oljas Súleımenov.

Onyń ústine, jazýshy nemeresiniń qandaı bolǵany jaıly da estelikter jazypty.

«Eskendir kishkentaıynan kóz aldymda ósti. Men 1995 jyly Italıada elshi boldym, ol  Rım qalasyndaǵy bastaýysh mektebine tústi. Keıin Parıjge aýysyp, sol jerde oqýyn aıaqtady. Ata-anasy erte ajyrasqandyqtan, ol bizdiń – ata-ájesiniń qolynda ósti. Bizdiń ulymyz sekildi boldy. Advokat Kýráchenko Parıjdegi Eskendir oqyǵan oqý ortalyqtaryna Eskendir jaıly suraý salǵan eken, alaıda eshqandaı teris jaýap kelmegen. Ózim biletin Eskendir 26 jylynda aýzyna araq ta, shylym da almaǵan, stýdent bolyp júrgen kezinde-aq kólik pen motosıkl aıdaýdy úırenip, júrgizýshi kýáligin aldy. Fransıada ondaı kýálik alý ońaı emes, aılap oqısyń, emtıhan tapsyrasyń. Eýropada bir de bir aıyppulsyz, eskertýsiz qanshama jyl kólik aıdady», - dedi Oljas Súleımenov.

Jazýshy osy joly da Muhıtovanyń bostandyǵyn shektemeýdi ótindi.

«Áýlettiń úlkeni retinde Astana qalalyq sotyna hat jazdym. Muhıtovany uqypsyzdyǵy úshin jazalaýdy, tek bostandyǵyn shektemeýdi ótindim. Áıelim meni qoldady. Qyzym Láılá men jaqyn týystarym meni bolashaqta túsine jatar. Láılá áli óziniń eki qyzyn tárbıelep, ósirýi kerek. Kóńili alańsyz bolsa deımin», - dep jazypty Oljas Súleımenov.

Eskendirdiń ata-anasy sottyń buǵan deıingi sheshiminiń ózgerissiz qalǵanyn qalaıtyndaryn jetkizdi. Al Malıka Muhıtova kinásin tolyq moıyndaǵanymen, sot sheshimin tym qatań dep baǵalady.

Qatysýshylardyń pikirin tyńdaǵan sýdıa Ásem Ramazanova appelásıalyq alqanyń sheshim shyǵaratyn kúnin 14 qańtarǵa aýystyrdy.

Eske sala ketsek, belgili aqyn, jazýshy Oljas Súleımenovtiń nemeresi 27 jastaǵy Eskendir Súleımenov Astanada jol apatynan kóz jumǵan edi.  Jol apaty Máńgilik el – Kereı -Jánibek han kósheleriniń qıylysynda bolǵan. Jas jigit motosıkl júrgizip kele jatqan. Eskendir Súleımenovti Qyzylorda oblysy ishki ister departamentiniń basshysy, polısıa polkovnıgi Qaırat Muhıtovtiń qyzy Malıka Muhıtova qaǵyp ketken. 29 jastaǵy Malıka Muhıtova sot otyrysynda marqumnyń ata-anasynan jylap keshirim surady. Óziniń kinásin tolyǵymen moıyndap, zardap shekken tarapqa materıaldyq shyǵyndy tóleýge daıyn ekenin málimdedi.

24 qazanda ótken sot otyrysynda zardap shekken tarap sottalýshydan 14 mıllıon teńge mólsherinde materıaldyq shyǵyn óndirýdi talap etken edi. Alaıda keıin marqumnyń otbasy ol talap-aryzdy qaıtaryp aldy.

9 qarashada ótken jaryssóz barysynda memlekettik aıyptaýshy Álisher Baraev aıyptalýshy Malıka Muhıtovany eki jylǵa bas bostandyǵynan aıyrýdy jáne úsh jyl kólik júrgizýge tyıym salýdy suraǵvny belgili.

Marqumnyń ata-anasy qazaqstandyqtarǵa úndeý jasap, sottalýshynyń shyn ókingenine senbeıtinin aıtty.