Denıs Tenniń ólimi kúdikti Janar Tolybaevanyń qońyraýlarymen baılanysty bolýy ábden múmkin. Ol qandaı qońyraýlar? Marqum sportshynyń anasy osyǵan baılanysty sotta tyń derekter keltirdi, dep jazady Qamshy.kz aqparat agenttigi QazTag portalynyń deregine súıenip.

«Telefon qońyraýlaryna baılanysty ótinish jasaǵym keledi. Denıstiń ólimine sol nómirdiń qatysy ábden bolýy múmkin. Bul másele kelesi tyńdalymǵa deıin anyqtalady dep úmittenemin» - dedi Oksana Ten dúısenbide ótken sot otyrysynda.

Denıs Tenniń anasynyń aıtqanyna sensek, sottalýshy Janar Tolybaeva 2018 jyldyń sáýirinen bastap sheteldik bir nómirmen jıi habar almasyp turǵan.

«25 sáýirde saǵat 21:54-te Eýropaǵa qońyraý shalypsyń. Kimmen sóılestiń?», - dep surady Tolybaevadan Oksana Ten.

Alaıda sottalýshy Eýropaǵa habarlaspaǵanyn, ol qońyraý ne Ózbekstan, ne Qyrǵyzstanǵa shalynǵan bolýy múmkin ekenin aıtty.

Biraq Oksana Ten óz degeninen qaıtpady.

«Qaıda habarlasqanyn anyqtaýlaryńyzdy suraımyn. 4-ten bastalatyn nómir Eýropaǵa tán. Shyǵys, kiris nómirleri bolǵan. Sen bir nómirge habarlastyń, ol nómir artynsha saǵan qaıta habarlasqan. Basqa kúni sen taǵy habarlastyń, kóp uzamaı saǵan basqa nómirge habarlasty», - dedi Ten.

«Operatorlar shyǵar. Men Eýropaǵa habarlasqan joqpyn», - dedi Janar Tolybaeva.

«Men kúnder boıynsha anyǵyraq aıtaıyn: 24 sáýirde Tolybaevaǵa bireý habarlasady, 25-i sol nómirge Tolybaevanyń ózi habarlasady. Bul qońyraý 6 mamyr, 3 shilde, 5 shilde, 7 shilde jáne 20 shilde qaıtalanǵan. Shyǵys qońyraýdan keıin birden kiris qońyraý... Osyǵan baılanysty onyń kimmen baılanysqa shyqqanyn anyqtaýlaryńyzdy suraımyn. Sońǵy qońyraý ol laqtyra salǵan sım-kartadan shalynǵan. Tolybaeva habarlasty, alaıda oǵan qaıta qońyraý shalynbady», - dedi Oksana Ten senimdi túrde.

♦Denıs Tenniń ólimi: Kýáger eki polıseı oqıǵanyń qalaı bolǵanyn baıandady

♦Denıs Tendi kim óltirgeni belgili boldy

Aıta keteıik, Eldiń maqtanyshy, qazaqstandyq fıgýrıst Denıs Ten 2018 jyldyń 19 shildesinde qaıtys boldy. Denıs óziniń kóligindegi aınany urlamaq bolǵan eki uryny baıqap qalady. Ustamaq bolǵanda, qylmyskerlerdiń  biri onyń sanyna pyshaq salyp jiberedi. Kóp qan joǵaltqan Denıs Ten aýrýhanada qaıtys boldy. Denıstiń jasy nebári 25-te edi.

♦"Denıs Tendi tapsyryspen óltirgen bolýy múmkin"

Fıgýrıstiń isi boıynsha búginde úsh kúdikti anyqtalyp otyr: Olar - Arman Qudaıbergen, Nuraly Qıasov jáne Janar Tolybaeva.

♦"Denıs Ten pyshaqtan qoryqqan joq": Qylmysker sportshyny qalaı óltirgenin aıtyp berdi