QR Aqparat jáne komýnıkasıalar mınıstri Dáýren Abaevqa jýrnalıser Qazaqstandaǵy ınternet sapasyna qatysty, ne sebepti kúnige keshke ınternetke kirý qoljetimsiz bolatyny jaıynda suraq qoıdy. Mınıstr, óz kezeginde, «men ınternetke kirgende eshqandaı másele týyndamaıdy» - dep jaýap beripti, dep jazady Qamshy.kz aqparat agenttigi Vlast.kz saıtyna silteme jasap.

«Internet únemi istemeı qalady degen - jalǵan aqparat. Bilýimshe, anda-sanda tehnıkalyq keleńsizdikter týyndap jatady. Bul másele tóńireginde birneshe ret pikir aıtqan bolatynbyz, bizdiń tarapymyzdan eshqandaı da tehnıkalyq qatelikter jiberilmeıdi», - deıdi mınıstr.

Onyń aıtýynsha, mınıstrlik jeke óńirlerde, qalalarda, ár operatorda baılanys sapasyn baqylap otyrady.

«Árbir jaǵdaıǵa nazar aýdaryp, máseleni sheshý kerek, sizder ne sebepti ınternetke shyǵý úshin İR qurylǵylaryńyzdy aýystyrasyzdar? Internet joq pa? Kúnige istemeı qala bere ma? Men bumen kelispeımin, ıa, ara-tura tehnıkalyq máselelerden keleńsizdikter týyndap qalatyn shyǵar, biraq kúnige ınternette másele bolmaıdy.

Biz Qazaqstanda ınternet pen ınternet-resýrstardyń qyzmetine qandaı da bir tehnıkalyq kedergiler jasamaımyz», - dep aıtyp ótti mınıstr Abaev.

Tilshiler «Ózińiz ınternetke keshki ýaqytta kiresiz be?» degen suraǵyna Dáýren Abaev bylaı dep jaýap berdi:

«Kúnige keshke kiremin dep aıtpaımyn, keıde kiremin, naqty bir grafıgim joq. Alaıda men ınternetke kirgende eshqandaı da másele bolmady».

Mınıstr bul másele jóninde baılanys operatorlaryna júginýge keńes berdi.