Aqtóbelik stýdentti tóbeles kezinde pyshaqtap ketken dep jazady Qamshy.kz aqparat agenttigi. 

"bir-birimen túsinise almaǵan jasóspirimder zırat basynda máseleni sheshpek bolady. Keıin jaǵdaı shekten shyǵyp, jasóspirimder stýdentti pyshaqtaǵan. Ol aýyr jaraqat alyp, ómir boıy múgedek bolyp qalýy múmkin", — delingen habarlamada. 

Jasóspirimderdiń tóbeles kezinde pyshaq qoldanýy birinshi ret emes eken. Buǵan deıin de osyǵan uqsas jaǵdaı bolǵan.

1 kýrs stýdenti ózi oqyǵan mektepke qan josa bolyp jetken. Birden jedel járdem shaqyrýǵa qoryqqan. Aýyr jaraqattanǵan jasóspirimniń ákesi balasyn aýrýhanaǵa taksımen jetkizgenin aıtty. Ákesiniń sózine qaraǵanda, uly tóbeleske deıin úıde bolǵan.

"Ulym tóbeles bolatyn jerge shaqyrǵan soń barǵan, sol kezde ony tepkilep, pyshaqtap ketken. Pyshaq bir santımetr júrekke jetpeı qalǵan. Áıtpese ulymnan aıyrylyp qalar ma edim? Álgi jigitter maǵan "ulyńyz ólgen joq qoı, nege daý shyǵaryp otyrsyz?", - deıdi. Sonda ne ulym ólýi kerek pe edi?", deıdi Nurlan Tenelov. 

Al dárigerler bolsa balanyń aman qalýynyń ózin ǵajaıypqa balap otyr. Sebebi jasóspirim kóp qan joǵaltqan. 

Resmı derekterge sensek, tóbeleske 4 mektepten 40 jasóspirim qatysqan. Qazir polısıa qyzmetkerleri tóbeleske ne sebep bolǵanyn anyqtap jatyr. 

"Buǵan bizdiń mekteptiń oqýshysy kináli emes. Bul múmkin emes jaǵdaı. Barlyq balalar qashqan kezde, ol da birge qashyp ketken. Onyń qolynda pyshaq bolmaǵan", - deıdi № 22 mektep dırektorynyń orynbasary Nazgúl Sardaeva. 

Bilim basqarmasynyń qyzmetkerleri áli kúnge deıin tóbeleske ne sebep bolǵany anyqtalmaǵanyn aıtty. 

Densaýlyqqa zıan keltirý jáne usaq-túıek buzaqylyq isi boıynsha sotqa deıingi tereý isi júrip jatyr.