Azat Perýashev aımaqtar men qalalardaǵy kóshe, mekeme ataýlaryna 750-ge jýyq Alash qaıratkerleriniń esimin berýdi usyndy. Bul jóninde respýblıkalyq mańyzy bar qalalar men oblys ákimderiniń atyna tıisti hat joldandy.

Atalǵan 750 arystyń tizimi jasalyp, tipti, olardyń qaı óńirde, qaı qalada dúnıege kelgeni, qaıda qyzmet etkeni de anyqtaldy. Bul jınaqtalǵan tizim ákimderge jiberildi.

«Aq jol» partıasynyń tóraǵasy hatta «osy baǵyttaǵy jumysty jalǵastyrý – búkil qoǵamymyzdyń jáne jańǵyrǵan zamanymyzdyń ózekti talaby. Mysaly, «aqjoldyq» depýtattardyń saýalyna berilgen resmı aqparat boıynsha el aýqymynda Lenın (506 kóshe), Kırov (54 kóshe), Marks (40 kóshe), Krýpskaıa (28 kóshe), Sverdlov (24 kóshe), Engels (23 kóshe) atyndaǵy kósheler, mekemeler men aımaqtyq ataýlardyń tapjylmaǵan kúıi turǵany túsiniksiz», - dep málimdeıdi.

Sol sebepti «Aq jol» ákimderden aımaqtar men qalalardaǵy kóshe, mekeme ataýlaryna elimizdiń taǵdyryna esh qatysy joq adamdardyń ornyna, birinshi kezekte ult táýelsizdigi jolynda janyn pıda etken Alashtyń kórnekti qaıratkerleriniń esimderin berýdi usynyp otyr.

«Alash arystaryn ulyqtaý – eshbir basqa etnosqa qarsy baǵyttalǵan bastama emes. Kerisinshe, bizdiń oıymyzsha, Alash muraty búkil qazaqstandyqtardy biriktirip, elimizdiń naǵyz ulttyq ıdeıasyna aınalýy tıis», - delingen resmı hatta.