Elimizge belgili ánshi, birneshe tanymal ánderdiń avtory Gaýhar Álimbekova "alaıaqtyq" jasady degen aıyptaǵylyp, 6 jylǵa bas bostandyǵynan aıyrylǵan bolatyn. Bul jaıt búkil jurtty eseńgiretip, atalmysh oqıǵaǵa baılanysty áleýmettik jelide túrli sózder de aıtyldy, dep jazady Qamshy.kz aqparat agenttigi.
Gaýhar Álimbekova óziniń oqıǵasyna baılanysty hat jazyp, ony Bıbigúl Dáýletbekqyzy óziniń Facebook paraqshasynda jarıalapty.
"Qalaısyńdar? Mende bári tamasha!!! Qaıran Qazaǵym-aı, ne bop ketti, túsinbeı qaldym. Eshbir dálel bolmasa da, eń bastysy – aqshany alǵan adam tolyq moıyndap tursa da, qalaı bári astan-kesten bop ketti, meń-zeń bop, júregim bir sátte toqtap qalǵandaı boldy...
Alaıaqtyq degen de – úlken bir óner ǵoı, meniń qolymnan án shyǵaryp, sol ándi jetkizgennen basqa qolymnan eshnárse kelmeıdi ǵoı, qaıtem, mańdaıǵa jazylǵandy kórip jatyrmyn. Múmkin Baqyt táte meni temir torǵa otyrǵyzdym dep, máz bop baqytty bop júrgen shyǵar, men oǵan jamandyq tilemeım, Alla razylyǵy úshin keshirdim. Allanyń osy bir synaqty bergenine shúkir. Eń mańyzdysy-bul shirkinderdiń tumshalanǵan temir tordyń ishinde bas bostandyǵymnan aıyrǵanmen, meniń Allaǵa degen senimim men halyqtyń maǵan degen-ystyq yqylasy men meniń halyqqa degen úlken mahabbatymdy tartyp ala almaıdy, sebebi shyǵaryp alǵan qolyma gıps saldyrýǵa emhanaǵa aparǵanda, sol jerdegi qyz-kelinshekter meni tanyp qoıyp, qushaqtap jylap, sabyrly bol-degende, túk túsinbeı, bular qaıdan biledi? - dep turyp qaldym. Sóıtsem bári ınstagram jelisinen habardar eken. Kózimniń jasy mólt-mólt etip, "Bir tamshy kózdiń jasyndaı" boldy. Qysqasy, meıli, ýaıymdamańyzdar, bári jaqsy, Alla násip etse-amandyqpen kezdesermiz!!! Aıtqandaı, keshe abyr-sabyrmen umytyp ketippin, túnde osynda kelip tar bólmege, tas tósekke kep jatqanda kózim temir tormen qorshalǵan terezege túsip jatyp-osy kúni anam-marqumnyń Jer-besikke bólengen kúni ekeni esime túsip, kóz jasyma erik berdim. Bir mezette apamnyń alaqany mólt-mólt etip aqqan kóz jasymdy toqtatyp, mańdaıymnan, shashymnan sıpap, "Jasaǵan bere salǵanym, sabyrly bol"-dep jubatqandaı boldy. Árýaǵyńnan aınalaıyn Ǵazız-Anam, Asqar Taý-Ákem, jatqan jerleriń jaıly, jandaryń-jánnatta bolsyn!!!
Súıikti qyzdaryńyz: Gaýhar Álimbekova,
2 aqpan 2019 jyl" - dep jazypty ánshi.
Esterińizge sala keteıik, Gaýhar Álimbekovaǵa qatysty sot otyrysy ótip, sot ánshini 6 jylǵa bas bostandyǵynan aıyrý týraly úkim shyǵarǵan bolatyn.
Usynǵan: Nazerke Labıhan
