Astanada bir otbasynyń bes balasy kóz jumǵan qaıǵyly jaǵdaı týraly kýágerler aıtyp berdi. Aıtýlarynsha, balalardy qutqarýdyń múmkindigi bolmapty.

Astana ákimi qaıǵyly jaǵdaıǵa qatysty qara jamylǵan otbasyǵa kóńil aıtyp, shuǵyl jınalys ótkizdi, dep habarlaıdy Qamshy.kz aqparat agenttigi 24 habar arnasyna silteme jasap.

Jıynda ákim qara jamylǵan otbasyǵa barlyq kómek kórsetýdi tapsyrdy. Aýdan ákimderinen Tótenshe jaǵdaılar departamentimen birlesip, tekserý jumysyn júrgizýin surady. "Bul jaıt TJD tarapynan ketken qatelik saldarynan boldy" degen pikir aıtty.

Al, kýágerlerdiń aıtýynsha, balalardy qutqarý múmkin bolmapty. Órt sóndirýshiler kelgenge deıin órtengen úıge kirgender balalardy alyp shyǵa almaǵan.

-Onda shýlap jatqanyn estidim. Júgirip terezege keldim. Kirip edim, qap-qarańǵy boldy. Eshteńe kórinbedi. Ol jaqta óte ystyq boldy. Qolymmen sıpap kórip em, eshtene tappadym, – deıdi otbasynyń týystary Janat Áıtimov.

Órt saldarynan 5 bala qaza boldy. Kórshileriniń aıtýynsha, olardyń bári qyz balalar. 

-Olardyń ata-anasy jumysta boldy. Ákesi kólik jóndeıtin jerde isteıdi. Anasyn bilmeımin. Anasy jaqynda ǵana jumysqa shyqqan. Buǵan deıin únemi balalarynyń qasynda bolǵan, – deıdi kórshisi Rahym Áshimbaev.

Órttiń shyǵý sebebi resmı túrde aıtylǵan joq. Úıdiń peshpen jáne toq quralymen jylytylatyny anyqtaldy.