Bir apta buryn ǵana Fozıla Dosmetovany kópshiligi úshemniń týylýymen quttyqtaǵan bolatyn. Eki qyzy men bir balasy bar áıel úshem bosanyp, kópbalaly analar qataryna qosylǵan edi, dep jazady Qamshy.kz aqparat agenttigi otyrar.kz saıtynyń málimetine súıenip.
Ótken aptada dúnıege kelgen balalar ýaqytynan erte týylǵan, anasynyń da jaǵdaıy aýyr bolypty, alaıda dárigerler balalar men ananyń ómirin saqtap qalǵan. Al búginde Fozıla Dosmetova balalaryn jalǵyz ózi baǵyp otyrǵany belgili boldy. Sondaı-aq, bul otbasynyń kúnkóris jaǵdaıy tym tómen, ózderiniń jeke baspanasy da joq eken. Eń qorqynyshtysy, alty bala anasymen kóshede qańǵyp qalýdyń sál-aq aldynda tur, olardy jaldamaly páterlerinen qýyp jatqan kórinedi.
Onyń qurbysy Ulbolsyn Abdaýalıeva kópbalaly ananyń qandaı jaǵdaıda kúneltip júrgenin kórsetti. Jaqynda ǵana bosanyp shyqqan áıeldi balalarymen eki kúnnen keıin taǵy da aýrýhanaǵa alyp ketipti. Dárigerler úshemniń densaýlyǵyna alańdap otyr eken, eki bólmeli páterdiń ishi sýyq, al jylytatyn quraldy paıdalaný tym qaýipti deıdi. Áıeldiń qalǵan úsh balasy aǵash taqtaıdyń ústinde uıyqtaıtyn kórinedi jáne úıdiń ishinde shomylyp, kir jýady eken. Bir soraqysy, jaqyn arada kópbalaly otbasy bul páterlerinen de aıyrylmaq. Jaldamaly páterdiń ıesi otbasynan jaqyn kúnderi úıdi bosatýyn talap etipti.
«Olar bul úıde eki jyldan beri turyp keledi. Al qazir bularǵa kóshińder dep aıtyp jatyr. Birinshiden, bul otbasynyń úlken qaryzy bar. Ekinshiden, olar jylytatyn peshti qoldanyp otyr. Úıdiń ıesi Astanadaǵy qaıǵyly oqıǵa qaıtalana ma dep qorqýda. Endi bul otbasy qaıtpek? Qaı jerdi panalaıdy?» - deıdi qurbysy.
Balalarynyń úlkeni 17 jasta – Gýzal Dosmetova, keıin 16 jastaǵy Shadıar – ekeýi jaqyn mańdaǵy dúkennen azyq-túlikti qaryzǵa alady eken. Eki jasóspirim mektepte oqıdy, biraq olardyń avtobýsqa minetin aqshalary da joq. Analary aýrýhanada kezde kórshileri qoldarynan kelgenshe kómektesip otyrypty. Gýzaldyń aıtýynsha, mundaı aýyr jaǵdaıda turyp jatqandyqtan, mektepte oqý úlgerimderi de aıtarlyqtaı jaqsy emes eken.
«Bizdiń jaǵdaıymyz tym qıyn, biz de barlyq adamdar sekildi jaqsy ómir súrgimiz keledi, anamyzdy qatty saǵyndyq. Ólmestiń kúıin keship júrmiz. Mektebimiz úıden tym alysta ornalasqan, avtobýsqa minetin aqshamyzdy ázirge anamnyń qurbysy berip otyr. Azyq-túlikti de qaryzǵa alyp otyrmyz, biraq ony da qashanǵa deıin qaryzǵa bere beredi eken... Maǵan UBT-ǵa daıyndalý kerek, biraq qazir oǵan tipti múmkindik joq. Mektebimiz alysta bolǵandyqtan eki avtobýspen baramyz. Al endi baspanamyzdan da aıyrylaıyn dep otyrmyz...» - deıdi Gýzal Dosmetova.
Zańger Nurbol Nurhanov bul otbasynyń jaǵdaıyn estı sala kómektesýge nıet bildirgen. Ol kópbalaly anaǵa memleketten áleýmettik kómek alý úshin qujattaryn daıyndaýǵa kómektesip júr.
Aıta keteıik, Fozıla Dosmetova birer jyl buryn eki balasymen jesir qalǵan. Keıin ekinshi ret qurǵan otbasy sátsiz bolsa, úshinshi kúıeýi bul áıeldiń aıaǵy aýyr ekenin bilgennen keıin Ózbekstanǵa qashyp ketipti. Budan bólek, otbasynyń 800 myń teńge nesıesi bar eken, biraq ony tóleýge kópbalaly ananyń jaǵdaıy jetpeıdi.
Usynǵan: Nazerke Labıhan
