Kúni keshe ǵana Astana qalasynyń ákimdigi kóp balaly analarǵa jıyn ótkizýden bas tartyp, olardy jeke-jeke qabyldaıtyndaryn málimdegen. Biraq buǵan kelispegen olar Astana konsert zalyna jınalyp, qala ákimin ashyq suhbatqa shaqyrdy dep jazady Qamshy.kz aqparat agenttigi Azattyqtyń deregin negizge alyp.
Aldymen halyqty qabyldaýdan bas tartqan ákimdik, 1 saǵattan asa ýaqyttan keıin jınalǵandardy akt zalǵa kirgizip, tynyshtyq saqtaýyn surady. Astana qalasynyń ákim Baqyt Sultanov bul joly sahnaǵa ózi shyǵyp, sóz sóıledi.
«Suraqtaryńyzdy qaraý úshin arnaıy ashyq esik jarıaladyq. Biraq bylaı shýlap, jınalyp, qatty aıtqandaryńyz durys emes. Sondyqtan ár másele sheshilip, ár otbasynyń jaǵdaıy qaralady. Ýáde berip otyrmyn. Tıisti baǵdarlamalar, sharalar barlyq oblystarda ázirlenip jatyr. Bul bir kúnde sheshiletin másele emes», - dedi Sultanov.
Alaıda ákimnen naqty jaýap ala almaǵan kóp balaly analar "máselemiz sheshilmeıinshe ketpeımiz" dep akt zaldan shyqpaıtyndaryn málimdedi.
Eske sala keteıik, 4 aqpanda Astanadaǵy aýdandardyń birinde kenetten shyqqan órtten 2006, 2008, 2013, 2015 jáne 2018 jylǵy 5 qyz bala qaza tapty. Oqıǵa bolǵan sátte olardyń ata-analary úıde bolmaǵan.
Osy oqıǵadan keıin jer-jerde kóp balaly analar bas kóterip, memleket basshysy Nursultan Nazarbaevtan baspana men áleýmettik jaǵdaılaryn kóterýdi talap ete bastady.
Usynǵan: Ásel Bolatqyzy
Pikir qaldyrý