Astanada qala ákimi Bahyt Sultanovtyń tóraǵalyǵymen qala turǵyndarynyń ómir súrý sapasyn jaqsartý jónindegi jumys tobynyń otyrysy ótti, dep habarlaıdy Qamshy.kz aqparat agenttigi Astana qalasy ákimdigine silteme jasap.
«Sońǵy ýaqytta aýdandyq ákimdikter men salalyq basqarmalar azamattardy qabyldaý jumystaryn júrgizdi. Nátıjesinde asa muqtaj otbasylardyń derekter bazasy jasaldy, ár otbasynyń portretin túzip, naqty qajettilikteri men problemalaryn kórip otyrmyz. Birinshi kezeńde shuǵyl túrde azyq-túlik, kómir, mektep kerek-jaraqtarymen qamtylyp, aqparattyq-túsindirý keńesteri ótkizildi. Demeýshiler men eriktiler aýdandar ákimdikteriniń ýaqytsha turaqtar men jekemenshik úı qurylystarynda gaz taldaýyshtaryn ornatý jónindegi bastamalaryn qoldady. Árbir otbasyn qoldaý boıynsha jeke sharalar jospary ázirlendi», – dep atap ótti Baqyt Sultanov.
Azamattardy qabyldaý kezinde kóterilgen túıindi máselelerdiń biri – turǵyn úıdiń qoljetimdiligi.
«Asqar Kemeńgeruly, sizge eski ári avarıalyq turǵyn úılerdi buzý jáne úleskerlerge kómek kórsetý úshin qurylǵan ınstıtýttardy biriktirý esebinen qosymsha resýrstar izdestirýdi tapsyramyn (anyqtama retinde: «Elorda Damý» JSHS – «Nurly jer» turǵyn úı qurylysy baǵdarlamasy men avarıalyq turǵyn úılerdi buzý jobasy sheńberinde jobalardy iske asyrady, «Elorda qurylys» JSHS – problemaly nysandardyń qurylysyn aıaqtaýdy uıymdastyrýmen aınalysady, sondaı-aq «Nurly jer» turǵyn úı qurylysy baǵdarlamasyna sáıkes jańa turǵyn úı keshenderiniń qurylysyna qatysady). Osy eki baǵytty mysalǵa ala otyryp, búdjet qarajatyn taýyp, shet aımaqtardy eski jáne apatty úılerdi buzý baǵdarlamasyna, múmkin, Astananyń shetinde ornalasqan qazirgi Qaıta jańartý baǵdarlamasyna qosymsha ázirleý jolymen qosý kerek. Biz az qamtylǵan otbasylardy jáne kómekke asa muqtaj, onyń ishinde kóp balaly otbasylardy mýnısıpaldyq turǵyn úımen qamtamasyz etýimiz kerek», – dedi ákim.
«Sonymen birge, biz halyqtyń áleýmettik osal toptary úshin mýnısıpaldyq jalǵa beriletin turǵyn úıge qoljetimdilik máselesi ótkir turǵanyn túsinemiz. Azamattardyń tabysy páter alýǵa nesıe alý úshin jetkiliksiz bolǵandyqtan, biz búgingi kúni qalalyqtardyń ýaqytsha turaqtarda, 15-20 myń teńgege bólme jaldap, jataqhanalar nemese zańsyz qurylystarda turyp jatqanyn kórip otyrmyz», - dep sózin jalǵastyrdy.
Ákim «Jumyspen qamtýdyń jol kartasy», «Bıznestiń jol kartasy» baǵdarlamalarynyń múmkindikterin paıdalana otyryp, qıyndyqtarǵa tap bolǵan árbir otbasyǵa áleýmettik qoldaý men ataýly áleýmettik kómek kórsetýdi tapsyrdy. Bul rette, ol qalalyqtardyń tólem qabilettiligi deńgeıin arttyrý qajettigine basa nazar aýdardy.
«Malıka Erlanqyzy, kóp balaly otbasy múshelerin joǵary aqy tólenetin jumyspen qamtamasyz etý múmkindigin qarastyrýdy tapsyramyn. Biliktiligi jetkiliksiz bolǵan jaǵdaıda, keıinnen qala úshin mańyzdy basym baǵyttarǵa jumysqa ornalastyrý arqyly biliktiligin arttyrýdy qamtamasyz etý qajet. Sondaı-aq qolda bar aqparattyń negizinde Turǵyn úı sertıfıkattaryn tapsyrý múmkindigin qosa alyp, kómek kórsetý úshin resýrstardy jumyldyrý algorıtmin jasaýdy tapsyramyn», – dedi Baqyt Sultanov.
Aýdan ákimderine ákimdik basqarmalarynyń basshylarymen birge qala basshysy buryn jarıalanǵan «Ashyq esik aptalyǵy» aıasynda azamattarmen jeke kezdesýlerdi jalǵastyrýdy tapsyrdy.
«Kóp balaly otbasylar men basqa da azamattar aıtqan barlyq suraýlar men ótinishterdi taldap jedel júıege keltirý kerek jáne jumys tobynyń qaraýyna Úkimetke joldaý qajet», – dep málimdedi ákim.
Aıta keteıik, sońǵy málimetter boıynsha, búgingi tańda Astanada 4 jáne odan da kópbala tárbıelep otyrǵan 10095 otbasy turady.
Usynǵan: Gúlim Jaqan
