Almaty oblysyndaǵy Ekpindi aýylynyń turǵyndary ákimderin jer-kókten tappaı, telearna arqyly izdeý jarıalady. Tek kóktemgi sý tasqynynda kórinetin shendiler esepterine de ózderine yńǵaıly jurtty shaqyryp kúıdiredi, deıdi. Sondyqtan sý, jaryq, jol máselelerin aıta almaı qınalady eken. Halqy túrin umytqan okrýg basshysyn biz de kórgimiz kelip edi, alaıda, sheneýnik oblys ákimi Battalovtyń erteńgi jınalysyna aldyn ala Taldyqorǵanǵa ketipti. Áıtpese, tómendegi buqaranyń bazynasyn beske bilip otyr, tek joǵarydaǵy basshysy mańyzdyraq sekildi. Bul týraly Qamshy.kz aqparat agenttigi Eýrazıa birinshi arnasynyń deregine súıenip habarlaıdy. 
 
“Ákim degendi kórmeımiz de, tanymaımyz da”. 

“ Men bilmeımin, ákimdi tanymaımyn da”.

Bir emes myna jınalǵan ekpindilikterdiń kóbi ákimderiniń túrin umytqan. Barsa tappaıdy, shaqyrsa kelmeıdi. Tek kóktemde sý tasyp, mazalaryn alǵanda nókerlerin jiberetinge uqsaıdy. Al, ásheıin kúnde shamshyraqpen izdesek te, aldymyzdan eshkim shyqpaıdy deıdi. Halyqtyń jaǵdaıyn suramaǵannyń kesiri, problema aýylda shash etekten. Mysaly...
 
“On bes jyl boldy qonystanǵanymyzǵa. Áli bir vodoprovod sý almadyq. biz de qara jerden sý iship otyrmyz. Ózimiz sýy joq jerden kelip edik. Bizge birinshi másele sý kelsin, - dep aıtty turǵyn Zeınesh Shektibaeva.
 
“ Tórt jyl svetsiz otyrdyq. 2011 jyldan beri árqaısymyz aqsha jınap, 35 myńnan transformator satyp aldyq. Myna baǵanany Aqshıdan aldyq. 57 jylǵy baǵanasy bul”, - deıdi turǵyn Qonysbaı Esbosynov.

Bireýdiń eski baǵanasynan toq tartyp júrgenderi azdaı, urylar da sorlatady jurtty. Aýyldyń 70 paıyz otbasyn ákkiler túgel tonap úlgergen. Qoradaǵy mal taýsylǵan soń, úıdegi tehnıkaǵa dánigip alypty bul kúni. Polıseıge shaǵymdanady. Biraq on jyl burynǵy aryzdarymyzdyń ózi áli kóterilmegen, ashylmaǵan dep kúıinedi.

“Polısıa sonaý  GRES-ten keledi. Ol eki saǵatta keledi. Oǵan deıin ury Almatydan shyǵyp ketedi. Myna jerdegi ýchaskovyıǵa aıtsaq, bizdiń mindet emes. Sonda ol ne bitirip, ne istep júr. Adam bilmeıdi”, - dedi turǵyndardyń biri Jasan Jaqsylyqov.

Ekpindi Almatydan Astanaǵa aparar kúre jolda ornalasqan. Sol asfált aýyldy ekige qaq jaryp tur. Jolda birde bir belgi joq. Biraq kólik úzdiksiz. Talaı balanyń ómiri qyrshynnan qıylyp, talaı adam múgedek bolǵan. Ol da eshteńe emes, Ekpindiniń arǵy beti Qarasaı, bergisi İle aýdanyna qarasty. Halyq bólinbegenimen, halyqqa qyzmet etetinder bólinip, bále boldy, - deıdi. 

“ İle jaǵyna keletin jedel járdem Qarasaıdyń aýrýyn almaıdy. Qarasaıǵa kelgender İlenikin almaıdy. Amerıka men Sovet Odaǵy bolyp turmyz aý, shamasy. Egemendik alǵanymyz qaısy? Eki respýblıkadamyz. Bir aýyl. Bir jol”, - dedi aýyl turǵyny Tárbıa Saparbaeva.

Bir aýyldy emes, bútin bir okrýgti «bılep» otyrǵan ákimderi Ekpendiden 12 shaqyrym jerde otyrady. Alys ta emes. Bardyq. Tek, halyq kórmegen basshyny biz de kóre almadyq. Erteńgi oblys ákiminiń esebine erterek ketipti. On mınýtyn qımaǵan shendi orynbasarynan sálemdeme jiberipti. Bári ótirik, -deıdi. 

“Halyq tanymaımyz ákimdi deıdi. Nege tanymaıdy? Biz únemi baramyz. Al kórmedik degen ótirik áńgime. Ózim qansha kórip júrmiz ǵoı. Sý kóteriletin kezde kóktemde mindetti túrde  baramyz”, - Mejdýrechensk aýyldyq okrýgi ákiminiń orynbasary Batyrhan Ádilov.

Kóktem de jaqyndady. "Ákim keledi" degen úmitpen jurt taǵy qaldy. "Aıtpaqshy, sý tartý jumysy aýdan búdjetine baılanysty",- dedi sheneýnik. Jaryqty da jóndeýdi sol áriptesteri sheshedi eken. ", jolda belgiler bar, tek halyqtyń ózi abaılap júrmeıdi, kólikterdiń júıtkýine biz jaýapty emespiz" dep aqtaldy. Urylarǵa qatysty sózi de ákimdikke aıtyp eshteńe urlamaıdy degenge saıady. Sonymen, «bóriktiler» men buqaranyń sózi ekige qaq bólindi, Ekpindi aýylynyń ózi qusap...

Usynǵan: Nazerke Labıhan