Túrkistan oblysynda 44 tasymaldaýshy 1224 dana avtobýspen (shaǵyn avtobýspen) jolaýshylar tasymaldaý qyzmetin kórsetýde.  Oblystaǵy turaqty baǵyttar jelisi – 325 baǵyttaǵy 1090 kesteden turady. Oblys boıynsha 2018 jyly 797 mln. jolaýshy tasymaldanǵan. Bul kórsetkish ótken jylmen salystyrǵanda 1,8 paıyzǵa joǵary. 2019 jyly 865 mln. jolaýshy tasymaldanady dep kútilýde. Ótken jyly jalpy jolaýshylar kóliginde 18 turaqty baǵyt ashyldy. Bul týraly Túrkistan oblystyq jolaýshylar kóligi jáne avtomobıl joldary basqarmasynyń basshysy Bekzat Tilegenov málimdedi.

Odan bólek, 2019 jyldyń 1 qańtarynda áleýmettik mańyzy bar «Túrkistan – Badam» jáne «Túrkistan – Saryaǵash» temirjol baǵyttary ashyldy. Poıyzdar aptasyna 5 retten qatynaıdy. Bılet quny «Túrkistan – Badam» – 609 teńge, «Túrkistan – Saryaǵash» – 1114 teńge.

Sonymen qatar, 2019 jyldyń 4 qańtarynda aptasyna 2 ret jıilikpen «Túrkistan – Shymkent» jedel poıyzy iske qosyldy. Oryndar sany – 175. Bılet quny – 609 tg. Shymkent qalasynan shyǵý – 05-45 (dúısenbi), Túrkistan qalasynan shyǵý – 19-25 (juma).

Aıta keterligi, Túrkistan qalasynyń Ózbekstannyń Samarqand qalasymen saýda-ekonomıkalyq, týrısik áleýetin nyǵaıtý maqsatynda, 2019 jyldyń 1-shi toqsanynda «Túrkistan – Samarqand» turaqty halyqaralyq avtobýs baǵytyn ashý josparlanyp otyr.

                                                                   Túrkistan oblysy ákiminiń baspasóz qyzmeti