Maqtaaral aýdanynda áleýmettik medısınalyq saqtandyrý júıesindegi ózgerister týraly semınar ótti. Aýdan ákiminiń orynbasary Beısenbaı Tórebekov tóraǵalyq etken jıynǵa «Áleýmettik medısınalyq saqtandyrý qory» KEAQ Túrkistan oblysy boıynsha fılıalynyń bas sarapshysy Laýra Saparbekova, kentter men aýyldyq okrýg ákimderi, aýdandyq derbes bólim basshylary, aýdandyq aýrýhanalardyń bas dárigerleri, mektep dırektorlary jáne esepshiler qatysty. 

Alǵash bolyp sózge shyqqan L.Saparbekova mindetti áleýmettik medısınalyq saqtandyrý júesindegi ózgerister týraly baıandama jasap, jańa júıeniń paıdasy týraly keńirek túsindirip berdi. 

«Jańa júıeniń arqasynda azamat óz tańdaýy boıynsha elimizdiń aýmaǵyndaǵy kez kelgen emhanada tegin medısınalyq kómek ala alady. Emhanaǵa qajetti qarjyny tolyǵymen qor óteıdi. Kez kelgen dárihanada usynylatyn dárilik zattar qol jetimdi bolady. Sondaı-aq, azamat saqtandyrý júıesi arqyly aýdarylǵan jarnalar men medısınalyq uıymdarda kórsetilgen qyzmetter týraly aı saıynǵy aqparatty alý múmkindigine ıe bolady. Sapasyz qyzmet kórsetilse nemese quqyqtary buzylsa, qor arqyly óz múddesin qorǵaı alady» - dedi L.Saparbekova.

Jıyn barysynda aýdan mamandary tarapynan bas sarapshyǵa birneshe suraqtar qoıylyp, oǵan zań aıasynda tıisti jaýaptar berildi. Sondaı-aq, semınardy qorytyndylaǵan aýdan ákiminiń orynbasary B.Tórebekov mindetti medısınalyq saqtandyrý boıynsha aýdan turǵyndary arasynda túsindirý jumystary jalǵasyn tabatynyn atap ótti.

                                                                       Maqtaaral aýdany ákiminiń baspasóz qyzmeti