Búgin Almaty qalasynyń ákimi Baýyrjan Baıbek megapolıs halqynyń aldynda esep berdi, dep jazady Qamshy.kz aqparat agenttigi.

Ákimniń halyq aldynda esep berý sharasy 3 myńǵa jýyq adam syıatyn Respýblıka alańynda ótti. Ákim óziniń baıandamasynda jyldyq qorytyndy jasap, birneshe máselelerge toqtalyp ótti. Solardyń biri – ál-Farabı kóshesindegi jyldamdyqty saǵatyna 60 shaqyrymǵa deıin azaıtý máselesi boldy.

Qalanyń joǵarǵy bóliginde ornalasqan úlken kóshelerdiń birinde qozǵalys jyldamdyǵyn azaıtýǵa baılanysty birshama kólik júrgizýshileri shaǵymdaryn bildirip, qaıtadan jyldamdyqty burynǵy qalpyna keltirýdi talap etken bolatyn. Megapolıs basshysynyń bul sheshimine qarsy shyqqandar da boldy. Baýyrjan Baıbek bul máselege qatysty turǵyndardyń narazylyǵyna jaýap berip, ne sebepti ondaı sheshim qabyldaǵanyn túsindirdi.

«Ál-Farabı kóshesi – kólikter jarysatyn jol emes, qala ishindegi trassa. Ol kóshedegi jyldamdyqty saǵatyna 60 shaqyrym etip azaıtqannan keıin jol apaty 2,7-ge deıin tómendegen.

Buryndary bireýler jyldamdyqty asyryp, tez júrse de, bar bolǵany 2-3 mınýt qana únemdeıtin. Qazirgi tańda biz analız júrgizip jatyrmyz, bári de bir qalyppen júredi, jyldamdyqty asyrmaıdy, toqtap qalmaıdy, qozǵalys áldeqaıda jyldam. Júrip kelip, jińishke jerine kelgende bári turyp qalmaıdy, birqalypty trafık saqtalýda. Al keptelis ýaqytynda ortasha jyldamdyq 23 shaqyrymǵa deıin tómendeıdi», - dedi qala ákimi.

Onyń aıtýynsha, Ál-Farabı kóshesinde jyldamdyqty azaıtý tek kólikti joǵary jyldamdyqpen aıdaıtyndarǵa ǵana yńǵaısyzdyq týdyryp otyr.

«Kim kólikti jarysyp joǵary jyldamdyqta aıdaǵysy keledi solar qalanyń syrtyna baryńdar, Qapshaǵaı tas joly bar nemese basqa da trassalar kóp. Buǵan qarsy shyqqandardyń otbasynda jol apatynyń qurbandary joq. Eger jaqyndaryńyzdyń biri qandaı da bir qaıǵyly jaǵdaıǵa tap bolǵanda bulaı aıtpas edińizder, biz úshin árbir adamnyń ómiri mańyzdy. Jol apatynyń qurbandary – bireýiniń ata-anasy, týysy, ápkesi, qaryndasy, al qarsylyq bildirip otyrǵandar úshin olar eshkim de emes. Bul – óte úlken tragedıa. Adam ólimin azaıtý – búginde bizdiń basty maqsatymyz», - dedi Baýyrjan Baıbek.

Aıta keteıik, Almaty ákimi Baýyrjan Baıbektiń búgingi halyq aldynda esep berý jıynyna Premer-mınıstrdiń orynbasary Erbolat Dosaev,  Parlament depýtattary men mınıstrlik ókilderi qatysty.

Usynǵan: Nazerke Labıhan