Tórt balasy bar otbasynyń bir aılyq jalpy tabysy 114 myń 448 teńgege jetedi.

Eńbek jáne halyqty áleýmettik qorǵaý mınıstri Berdibek Saparbaev kópbalaly otbasylardaǵy ár balaǵa 20 789 teńge qashannan bastap tólenetinin málimdedi, dep habarlaıdy Qamshy.kz aqparat agenttigi Sputnik Qazaqstan saıtynyń deregine súıenip.

Saparbaevtyń aıtýynsha, kúnkóris deńgeıi 1 shildege 14 myń 849 teńge bolsa, shildeden bastap 20 789 teńgege kóteriledi. Iaǵnı, 1 shildeden bastap ataýly áleýmettik kómekti alatyndar sany 260 myńǵa adamǵa kóbeıip, qazirgi 571 myńnan 830 myń adamǵa deıin ósedi.

"Máselen, tórt balasy bar jalǵyzbasty otbasyn alaıyq. 1 shildege deıin 63 myń teńge ataýly áleýmettik kómekti alatyn bolsa, shildeden bastap 40 myń teńgege kóbeıip, 103 myń 945 teńgege deıin jetedi. Al qosymsha tólemderdi eseptegen kezde, bul otbasynyń bir aılyq jalpy tabysy 114 myń 448 teńgeni quraıdy", - dedi jańa mınıstr úkimet otyrysynda.

Sonymen qatar, shildeden bastap otbasynyń jıyntyq tabysyn eseptegen kezde, kópbalaly otbasylarǵa, "Kúmis alqa", "Altyn alqa" ıegerlerine, múgedek balalarǵa tólenetin járdemaqylar men shákirtaqy esepke alynbaıdy.

"Buǵan qosa, turmysy tómen otbasynyń balalaryna beriletin járdemaqy mólsheri de ózgeredi. Eger 1 shildege deıin ol 4 myń 834 teńge bolsa, 1 shildeden bastap ár balaǵa 20 789 teńge tólenedi. Bul járdemaqy 18 jasqa deıin, eger balalar joǵary oqý oryndarynda oqıtyn bolsa, 23 jasqa deıin tólenedi", - dedi Saparbaev.

Sondaı-aq, mınıstr áleýmettik kómekti taǵaıyndaǵan kezde, halyqty bekerden beker sandaltpas úshin suralatyn qujattar sany azaıatynyn atap ótti. 

"Munyń bári elektrondy túrde júzege asady. Eger keıbir málimetter joq bolsa, ata-anaǵa kelýdiń qajeti joq. Jergilikti jerlerde jumyspen qamtý ortalyqtary, ákimshilikter tıisti memlekettik organdarǵa suraý jasap, ózderine qajet málimetti alatyn bolady", - dedi ol.

Onyń aıtýynsha, óńirlerdegi otbasylardyń qajettiligin, turmysyn anyqtaý úshin áleýmettik kartalar jasalady. Osylaısha, ár otbasyǵa taldaý jasalyp, eń muqtajdaryna memleketten kómek kórsetiledi.

Usynǵan: Nazerke Labıhan