Baıaǵyda qoly qarýly jigit bir adamdy óltirip qoıady. Abaısyzda. Ólgen adamnyń balalary jınalady, sot bolady, ony ólimge kesemiz deıdi. «Mássaǵan, endi qaıttim?» - demeıdi ol. «Alysta turýshy edim, dúnıemdi januıama tabystaıyn, jaqyndarymmen qoshtasaıyn, qaryzdarymdy jabaıyn. Soǵan 3 kúnge ruqsat berseńiz» - deıdi ǵoı álgi beıbaq. Sol kezde sot kópshilikke qaraıdy da: «Buǵan kepil bolatyn adam bar ma?» - deıdi. Eshkim úndemeıdi. Sebebi, anaý jigit aldap ketip, kelmeı qalsa, oǵan kepil bolǵannyń basyn shabýy múmkin. Taǵy suraıdy. Eshkim úndemeıdi ári ony munda eshkim tanymaıdy.
⠀
Sol kezde qart sahaba Ábý Zar shyǵyp: «Men kepil bolamyn. Ony tanymaımyn, kelmeı qalsa, ólimińe kepil bolamyn» - deıdi. Bári qatty tańyrqap qalady. 

Úsh kún degen úsh saǵattaı ótedi de, ketedi. Turǵyndardyń bári qaıta jınalady. Kisi óltirgen jigit joq. Tiri jannyń bári ýáde berip ketken jannyń jolyna qarap tur. Biraq eshkim kórinbeıdi.

"Aldady-aý" dep sandaryn soqqaly turǵanda, alystan qarasy kórinedi. Júgirip keledi eken. Sonda onyń ýádesinde turǵanyna bári tań qalady. Ol bolsa: «Aýylym alys bolǵannan keıin keshiktim, bárine úlgerdim, endi ólimge daıynmyn» - deıdi. Sertten taımaǵanyna tánti bolyp, ólgen kisiniń balalary «biz keshirdik» deıdi.
⠀
Sonda sot ólim jazasy berilgen adamnan: «Sen óletinińdi bile tura osynda keldiń, nege qashyp ketpediń?» - deıdi. Ol: «Men sertimde turmasam, keıin musylmandar arasynda sert joıyla ma dep qoryqtym, sol úshin keldim» - deıdi. Endi sot Ábý Zarǵa burylyp: «Sen bul adamdy tanymasań da kepil boldyń, nege?" -deıdi. Ábý aqsaqal: «Keıin musylmandar arasynda baýyrmashylyq álsireı me dep qoryqqannan kepil boldym» - deıdi. Al ákesi ólgen balalar: «Eger biz keshirmesek, musylmandar arasynda meıirimdilik joıyla ma dep qoryqtyq, sol sebepti keshirdik» - deıdi.
⠀
Mine, buryn adamdar osyndaı bolǵan dep aıtatyndaı jaǵdaı. Ýádede turý, baýyrmal bolý, keshirim qylý. Bul mysaldyń arǵy túbi sol shúkir qylý shyǵar.. Ózine berilgen árbir qasıettiń, ár nyǵmettiń Qudaıdyń tarapynan saǵan syılyq etilgenin bilý.

Saıahatshy-jýrnalıst, Órken Kenjebektiń ınstagram paraqshasynan alyndy

Usynǵan: Maqpal Sembaı