Almaty oblysynyń Kerbulaq aýdanynyń kásipkerleri kóp balaly ári  jalǵyzbasty 3 birdeı otbasyǵa úı alyp bergen, - dep habarlaıdy Qamshy.kz aqparat agenttigi óńirlik komýnıkasıalar qyzmetine silteme jasap.

Búginde qoǵamda qaıyrymdylyq jasap, elge qol ushyn sozatyn azamattar kóbeıip keledi. Jaqynda Kerbulaq aýdanynda jeke kásipkerlerdiń bastamasymen qaıyrymdylyq is-sharasy ótti. Áz – naýryz merekesi qarsańynda ótken bul shara barysynda Saryózek aýylynda ornalasqan «Alasem» zaýytynyń bas dırektory Stanıslav Sherbakov, áleýmettik jaǵdaıy tómen otbasyǵa úıdiń kiltin tabystady.

«2013 jyly kúıeýimmen ajyrasqanmyn. Úsh balamen úısiz páter den páterge kóship júrgenime 5 jyldan asty. Balalarym oqýshy, tapqan tabysym olardyń kıimi men tamaǵynan artylmaıdy. Endi mine úlken ári taza ózimizdiń shańyraǵymyz bar», - deıdi qýanysh ıesi Jumaǵyz Medetova.

Qoǵaly aýylynyń azamaty, máslıhat depýtaty, jeke kásipker Qaırat Bekıev, sol aýyldyń alty balanyń anasyn Aıgúl Eshpaevaǵa úı syılap qýanyshka keneltti. Al, Taldybulaq  aýylynyń azamaty Kalen Tursyńbaev alty balamen úısiz júrgen Nadejda Lemeshkoǵa osy aýyldan jaıly baspana alyp berdi.

Sonymen qatar, Qaspan aýylynyń kásipkerleri Slambaı Toqabaev jáne  Vıtalıı Tarasenko 11 balanyń anasy Gúlnaz Shakenova men áleýmettik jaǵdaıy tómen 3 balaly otbasyǵa  qajetti azyq-túlikpen qamtamasyz etti.

«Meıirimdilik - adam boıyndaǵy eń izgi qasıetterdiń biri. Ana-ómirdegi eń úlken qurmetke laıyq adam. Sondyqtan da, kóp balany dúnıege ákelip, ultymyzdyń kóbeıýine úlken úles qosyp júrgen analarǵa qýanysh syılaý-biz úshin úlken baqyt» -  deıdi jeke kásipker Qaırat Botaıuly.

Áz-naýryz qarsańynda shańyraqtarynda shattyq ornap, bala-shaǵalarynyń qýanyshynda shek bolmaǵan analar óz taraptarynan qaıyrymdy jandarǵa sheksiz alǵystaryn jetkizdi. Bul ıgilikti shara áli de jalǵasyn taba bermek.  

Merýert Mahmutjan