Gúljan Qaraqusovanyń basy taǵy da daýǵa qaldy. Esterińizge sala ketsek Parlament jıynynda Májilis depýtaty Gúljan Qaraqusova qarttarǵa arnalǵan kooperatıvter salýdy usynǵan bolatyn. Aıtýynsha, ol qarttar úıi sekildi bolmaıdy.
"Biz qarıalarǵa arnalǵan úıler salýymyz kerek, erteń qartaıǵanda ózimiz balalarǵa kedergi keltirmeı sol jerge baryp turamyz. Ol qazirgideı qarttar úıi sıaqty emes, ózimizdiń jeke kooperatıv bolady. Endi birneshe jyldan keıin kóresizder, Tatána Mıhaılovna da (qarjy vıse-mınıstri), Tatána Ivanovna da (Májilis depýtaty), men de sol jerge baryp turamyz», - dep málimdegen mınıstrdiń sózine kúle qaraǵandar kóp boldy. Osyǵan baılanysty Serik Ábikenuly da Facebook paraqshasynda pikir bildirdi dep habarlaıdy Qamshy.kz aqparat agenttigi.
"Gýljan apam qyzyq-qyzyq oı aıtady osy. Aıtqanda da oıy durys, al sózi burys. Birdeńe oılap, birdeńe aıta salady. Buryn qazaqshasyna kúlýshi edim, endi orysshasy odan ozyp turmaǵanyn baıqaǵandaımyn. Qoıshy, áıteýir, apam qarttarǵa arnalǵan kooperatıv ashýdy usynypty. Sóıtedi de: endi birneshe jylda Tatána Mıhaılqyzy (qarjy vıse-mınıstri Saveleva), Tatána Ivanqyzy (Májilis depýtaty Iakovleva) úsheýmiz sondaı úıge baryp turamyz, balalarǵa "meshaıt" etpeımiz, - deıdi. Gýljan apam áli jas, keler jyly nebáry 70-ke tolady. Úı salynyp, kooperatıv ashylyp bolǵansha taǵy bir on jyl óter, soǵan deıin armany júzege asyp, ár qarıa mıllıon teńge zeınetaqy alatyndaı etse jaqsy edi. Óıtkeni, apam kooperatıv tabaldyryǵynan attaǵan kezde "Senato-májilis" metalýrgıa kombınatynda mańdaıdan teri shúmektep, tanaýdan býy burqyrap jumys istep jatqan azamattardyń birazy ilese barary anyq. El úshin kúndiz kúlmeı, túnde kirpik ilmeı qyzmet etken ondaı ardaqtylar el qatarly elý-alpys myńdyq zeınetaqyǵa telmirse obal ǵoı. Aýyr jumys istegen adamnyń tábeti jaqsy bolady, asqazandary tas qorytady, olarǵa elý myń usynsań qazandaǵy kójege ojaý matyryp ádettengen adamǵa sháı qasyq ustatqandaı bolasyń. Ashtan óledi. Apam alystan oılaıdy, munyń da bir amalyn tabar..." - dep jazady Serik Ábikenuly.
Serik Ábikenulynyń Facebook paraqshasynan
Usynǵan: Farıza Jomartqyzy
