Qyrǵyzstannyń burynǵy prezıdenti Almazbek Atambaev bul pikirin 17 naýryzda Bishkekte ótken Aqsy oqıǵasynda qurban bolǵandardy eske alý sharasynda aıtqan, dep jazady Qamshy.kz aqparat agenttigi Azattyq radıosynyń málimetine súıenip.

“Ómir boıy otbasylyq avtorıtarlyq rejımmen kúrese júrip, ishin kórmeı, syrtyn ǵana kórip, osyndaı adamdy bılikke alyp kelgenim úshin keshirim suraımyn” dedi Atambaev.

Atambaev qazirgi bılikti "otbasymen basqarý jolyna tústi" dep aıyptap, odan bas tartýǵa shaqyrǵan. Eks-prezıdent bılik burynǵy prezıdent Qurmanbek Bakıevtiń izin qaıtalap, ózin synaǵan azamattardy qýdalap jatyr dep aıtqan.

"Qazir tipti balalarǵa da tıisetin boldy. Bul bılik odan da qorqynyshty - olar qorqytý úshin bárin túrmege otyrǵyzyp jatyr" degen Atambaev.

Dál osy kúni Aqsy aýdanyndaǵy eske alý sharasynda sóılegen Qyrǵyzstannyń qazirgi prezıdenti Sooronbaı Jeenbekov "bıliktegi tamyr-tanystyqpen kúresken azamat retinde" eshqashan "otbasymen basqarý júıesine" jol bermeıtinin aıtyp, ózine deıingilerdi synaǵan.

"Bir kezderi memleketti qylmystyq top basqarǵan kezder boldy. Oǵan qoǵamnyń ózi de kóz jetkizip keledi. Biz halyqtyń arman-muratyn jaqsy bilemiz. Halyq bekerden-beker "Týra bıde týǵan joq, týrasyz bıde ıman joq" dep aıtpaǵan. Menen bastap bıliktiń úsh tarmaǵy muny umytpaýy kerek. Otbasylyq klanmen kúreskenderdiń aldyńǵy qatarynda bolǵan azamat retinde aıtarym, eshqashan otbasymen basqarýǵa jol bermeımin" dep aıtqan.

Qyrǵyzstanda burynǵy prezıdent Atambaev pen qazirgi prezıdent Jeenbekov arasyndaǵy jaǵdaıdyń nasharlap ketkeni jıi aıtylady. 2018 jyldyń aıaǵynda Atambaev jergilikti saıttardyń birine bergen suhbatynda prezıdent bireýler arqyly "ózine yqpal etýge tyrysyp otyr" dep aıyptaǵan.

Sooronbaı Jeenbekov 2017 jyly prezıdent saılaýynda saılaýshylardyń 54 paıyzyn jınap, jeńiske jetken. Ony prezıdenttikke Qyrǵyzstannyń sosıal-demokratıalyq partıasy usynǵan. Sol kezde prezıdent bolyp turǵan Almazbek Atambaev ony erekshe qoldaǵan.

2002 jyly naýryzdyń 17-inde bılikke narazylyq bildirip, beıbit sherýge shyqqandarǵa mılısıa qarý qoldanǵan. Oqıǵa saldarynan alty azamat qaza tapqan, ondaǵan adam zardap shekken.

Usynǵan: Nazerke Labıhan