Reseıdiń burynǵy Qarjy mınıstri, Esep palatasynyń basshysy Alekseı Kýdrın «ázirge AQSH ekonomıkasy álsiremeıdi» degen pikirde.

Onyń aıtýyna qaraǵanda, «AQSH tarapy áli 40 jyldan astam ýaqyt boıy álemdik ekonomıkada basymdyq tanytady. Sodan keıin ǵana baryp amerıkalyqtardyń ekonomıkasy álsireı bastaıdy». Ol bul pikirin «Moskva. Kreml. Pýtın» atty baǵdarlama barysynda aıtty.

–Álemdik soǵys pen básekelestik aldaǵy ýaqytta ekonomıka salasynda bolady. Ázirge álemniń bir-aq eli ǵana ekonomıkada basymdyǵyn tanytyp otyr. Bul jaǵdaı 40 jylǵa sozylýy múmkin. Sodan keıin ǵana baryp AQSH ekonomıkasy álsireı bastaıdy, –dep málimdedi ol atalǵan baǵdarlama barysynda.

Alekseı Kýdrınniń aıtýyna qaraǵanda,  qazirdiń ózinde Tramptyń birjaqty saıasatynyń arqasynda AQSH tarapy orasan zor tabys taýyp otyr. Bir ǵana syrttan keletin Qytaı taýarlaryna saýda salyǵyn salý arqyly el búdjetine mıllıard dollar qosymsha paıda túsip otyr. Biraq  AQSH ekonomıkasyndaǵy aıryqsha serpiliske  ózge elder qyzǵanyshpen de qarap otyrǵanyn jasyrmaý kerek.

Biraq AQSH ekonomıkasy sonshalyqty serpindi damyp jatqanyna qaramastan, eldiń áskerı shyǵyny men bereshegi jyl saıyn artyp barady. 2019 jyldyń aqpan aıyndaǵy AQSH -tyń syrtqy qaryzy 22 trıllıon dollarǵa jetti. Sońǵy bir aıdyń ózinde syrtqy bereshek 90 mıllıard dollarǵa ósip, 22,01 trıllıon dollardy qurady.

Ókinishke qaraı, Donald Tramptyń  prezıdenttikke túser aldynda halyqqa  bergen ýádesi oryndalmaı qaldy. CNN  aqparat agenttiginiń habarlaýyna qaraǵanda, sońǵy aıda  AQSH-tyń syrtqy qaryzy 2 trıllıon dollarǵa artqan. Al Barak Obamanyń 8 jyl  memlekettik basqarýy kezinde syrtqy bereshek 9 trıllıon dollarǵa ǵana artqanyn aıta keteıik.