Ákesi álemniń muhıttary men teńizderi, anasy kók aspandaǵy qara bult bolǵan kishkentaı Tamshy búgin qatty qýanyshty. Óıtkeni, ol alǵash ret jerge túspekshi.

Bıikten qaraǵanda jer óte ádemi eken. Jap-jasyl bir álem. Ádemi qyzǵaldaqtar men sarǵaldaqtar, raýshan gúlder men qońyraýgúlder, jasyl tal-terekter men jaıqalǵan kók shalǵyn. Osynyń bári Tamshyǵa beımálim bir álemdeı kórindi. Jerge tússe qýanyshqa bólenetindeı. 

Birden sirkirep, tópelep tamshy balalaryn tógip jibermeı Bult ana kók júzin biraz sharlady.

Jerge qaraǵan Tamshy bir adamdy kórdi. Ústine sýlyǵyn kıip, qolyna qolshatyryn ustap alypty. Ózi ashýly sıaqty. «Qap, taǵy da jańbyr jaýatyn boldy-aý. Jańbyrdy jek kóremin. Ústi-basymdy malmandaı sý qylǵannan basqa paıdasy joq» dep kúńkildep barady eken. Tamshy qatty ókpelep qaldy. Bul jerge asyǵyp tursa, muny da qalamaıtyn adamdar bar eken-aý. Taǵy biraz anasynyń qushaǵynda aspan kóginde júrgen Tamshy kenet úıiniń shatyryn jamap jatqan adamǵa kezikti. Ol da renjýli sıaqty. Jańbyr jaýsa, shatyrdan aqqan sý úıimdi alyp ketedi dep ashýlanyp, aspandy bult torlaǵan sátte shatyrǵa shyǵyp, jantalasyp jatyr eken. Tamshy muny kórip tipti de jerge túskisi kelmeı qaldy. Bul tek jer betine nár bergisi keledi ǵoı. Al adamdar munyń jer betine túskenin qalamaıdy eken. Solarǵa eregiskende bul tópelep, jer-aspannyń astań kesteńin shyǵaryp úsh-tórt kún boıy jaýatyn aq jaýynǵa aınalǵysy keldi.

Kóńili jabyrqaǵan Tamshy kenet jerde otyrǵan kishkentaı qyzdy kórdi. Ózi birnárse istep otyrǵan sıaqty. Anyqtap qaraǵan Tamshy qyzdyń kishkentaı, názik qyzǵaldaqtyń janynda jylap otyrǵanyn kórdi. Qyzǵaldaq názik kúltelerin kótere almaı basy salbyrap ketipti. Japyraqtary tipti jerge jatyp qalypty. Biraz ýaqyttan beri sý ishpeı, shóldep turǵany anyq. Al bul aýylda jańbyrdyń jaýmaǵanyna biraz ýaqyt bolǵan edi. Ystyq kún báriniń apshysyn qýyryp barady. Jan-janýarlar da sý izdep, salqyn men saıa qýalap saı-salany sharlap ketken. Shaqyraıǵan kún tóbede turyp alyp, bir jyljymaı tur-aý. Shirkin, jańbyr bolsa!

Tamshy qyzǵa da, qyzǵaldaqqa da jany ashyp ketti. Mine, ony jaqsy kóretin, ony qalaıtyn jandardy tapty-aý. Bult ana da aýyldyń jaǵdaıyn kórip, jany ashyp ketti. Dereý ashshy kúnniń kózin jaýyp, tamshy balalaryn jerge tóge bastady. Tamshy da qýanyp ketti. Baýyrlarymen birge Qyzǵaldaqqa kelip tógildi de, onyń boıyna nár bolyp quıyldy. Kishkentaı qyz da, aýyl halqy da qatty qýandy. Bári jańbyrdyń jaýǵanyn merekedeı toılap, balalar jalańaıaq júgirip, asyr-salyp bir jasap qaldy. Kishkentaı qyz ben Qyzǵaldaq ta qatty qýandy. Gúli basyn kóterip, qaıtadan jaınaǵanyn kórgen qyz tulymshaǵy jelbirep, alaqanyn shapalaqtap «Jaý, jaý, jańbyr, jaýa bershi!»dep ándetti.

Tamshy da óziniń kishkentaı qyz ben gúlge qýanysh syılaı alǵanyna qatty shattandy. Keıde bireýge qýanysh syılaý úshin bir tamshynyń ózi jetkilikti bolady eken-aý.

Mıra Sembaıqyzy