Almatyda birneshe áleýmettik kómektiń mólsheri kóbeıedi dep habarlaıdy Qamshy.kz aqparat agenttigi Almaty.tv saıtynyń deregin negizge alyp. 

Búgin qalalyq máslıhattyń kezekti sesıasynda áleýmettik kómek, turǵyn úı kómegi jáne múgedek balalardy úıde oqytýǵa arnalǵan járdemaqylardy birneshe esege kóbeıtý týraly usynystar aıtyldy. Iaǵnı, jan basyna shaqqanda tabysy kúnkóris deńgeıiniń eki ese mólsherinen aspaıtyn az qamtylǵan azamattarǵa kórsetiletin kómek 50 myń 500 teńgege deıin arttyrý kózdelse, «Baqytty otbasy» baǵdarlamasy aıasynda otbasy shyǵynynyń shekti deńgeıin 10 paıyzdan bes paıyzǵa deıin tómendetý qarastyrylǵan. Al múgedek balalardy úıde oqytatyn otbasyǵa toqsan saıyn beriletin járdemaqyny 30 myń teńgege deıin arttyrý josparlanýda.

«Ótken jyly járdemaqy 800 balaǵa tólendi. Bıyl da osy 800 balany qamtýdy josparlap otyrmyz. Bul járdemaqyny alý úshin qosymsha 11,4 mln teńge bólinip otyr. Aıtylǵan úsh áleýmettik kómektiń úsheýi de burynnan bar, bul jańalyq emes. Tek olardy alatyn adamdardyń sany men kómektiń kólemi ǵana artyp otyr», - deıdi Almaty qalasy Áleýmettik ál-aýqat basqarmasynyń basshysy Rahat Shımasheva.

Usynǵan: Ásel Bolatqyzy