Aqtóbedegi terakt kezinde jaralanǵan polısıa qyzmetkerine basshylyǵy baspana berdi. 25 jastaǵy Álibek Jetiǵarın 2016 jyldyń maýsymynda qarý-jaraq dúkenine shabýyl kezinde jaraqat alǵan. Sodan beri 3 jyl ótse de, densaýlyǵy dimkás jigittiń otbasy tek múgedektigi úshin alatyn járdemaqymen kúneltip kelipti. «Erligi úshin» medalin alǵan eks-polıseıdiń erligi nege kesh elendi? Bul týraly Qamshy.kz aqparat agenttigi Eýrazıa birinshi arnasynyń deregin negizge ala otyryp habarlaıdy.

Álibek Jetiǵarın polısıa sapyndaǵy eńbek joly osylaı tez aıaqtalady dep oılamaǵanyn aıtady. Adal eńbek etip, mansabym óser degen armany da bolǵan. Eki jyldyń ishinde jas jigit ózin tek jaqsy qyrynan kórsetipti. 6 márte maqtaý alǵan, sonyń ishinde 3 márte ishki ister mınıstrligi alǵys jarıalapty.

Sapta júrgen serjanttyń qatardan shyǵyp qalǵanyna 2016 jyldyń maýsymyndaǵy terakt sep boldy. Sol kúngi oqıǵa Álibektiń áli kóz aldynda. Patrúldik polısıaǵa «Pallada» qarý-jaraq dúkenine bir top qarýlanǵan adam shabýyl jasaǵany týraly habar jetedi. Oqıǵa ornyna birinshi bolyp jetkenderdiń arasynda osy Álibek te bar edi. 

«Eń birinshi bolyp bardyq, sol kezde bir top adam shyǵypjatqan kezde biz aldarynan kezdesip qaldyq. Sol kezde atys bolyp, ishimnen, qolymnan jaraqat aldym. 7-8 drob qaldy, ony alý ne bolmaı tur, ýaqtymen deneniń ústine shyǵady" dedi Álibek Jetiǵarın.

Sodyrlardyń soıqanynan jaraqat alǵan tártip saqshysy uzaq emdelgen. Alaıda, alǵan jaraqatynan oń jaq qoly jansyzdanyp qalypty. Keıin múgedektik berip, jumystan bosaǵan. Ózi qyzmet etken mekemege kerek bolmaı qalǵanyna renjigen jas jigit keıin sotqa shaǵymdanady. Osy túsinispeýshiliktiń barlyǵy neden týyndaǵanyn búgin aımaqtyń bas polıseıi ózi aıtyp berdi. 

Mahambet Ábısatov, oblystyq polısıa departamentiniń basshysy: «2018 jyldyń qarashasynda densaýlyq jaǵdaıyna baılanysty jumystan bosatyldy. Keıin anyqtaǵanymda bul men eńbek demalysynda júrgende bolǵan jaǵdaı ekenin bildim. Biraq ol týraly maǵan eshkim baıandamaǵan. Biz myna qazir kórsetip jatqan qurmettiń bárin sol kezde jasaýǵa tıis edik. Sondyqtan, sheshim qabyldap, olqylyq jibergen eki adam qyzmetinen bosatyp, birqatar basqarma basshylar meniń buıryǵymmen jazalaryn aldy ».

Álibek qyzmettik páter bolsa da, baspanaly bolǵanyna rıza. Jaqsy jańalyqty eń áýeli ata- anama, kelinshegime aıttym deıdi. Jas otbasynyń 4 jasar qyzy bar eken, kelinshegi ekinshisine júkti.

Álibek Jetiǵarın: «Qýanyshtymyn páter alǵanyma. Áke-sheshem, kelinshegim kórdi. Unady olarǵa da. 2 bólmeli, 60 sharshy metr. Bizge jetedi dep oılaımyn. Bári jaqsy, kishigirim remont jasaý kerek.»

Polısıa departamentiniń basshysy Álibekke qyzmettik páterde qalaǵanyńsha tura ber dep jomarttyq tanytty. Odan bólek, áriptesteri kómek retinde bir kúndik jalaqylaryn aýdarǵan. Jáne Álibek Jetiǵarınge osy ýaqytqa deıin alyp otyrǵan jalaqysynyń 50 paıyzyn aı saıyn aýdaratyn boldy.

 Usynǵan: Farıza Jomartqyzy