Qazaqstan Prezıdenti Nursultan Nazarbaev Astananyń bas meshitiniń qurylys ornyna tas qoıdy, dep habarlaıdy Qamshy.kz aqparat agenttigi Aqordanyń baspasóz qyzmetine silteme jasap.

Bul nysan EKSPO-qalashyqtyń janyndaǵy jańa saıabaq aýmaǵynda boı kóterip, kólemi boıynsha Botanıkalyq saıabaqtan da úlken bolady.

Qala ákimdiginiń deregi boıynsha, meshittiń syıymdylyǵy 30 myń adam. Ony demeýshiler salyp jatyr.

Memleket basshysy Nursultan Nazarbaevtyń aıtýynsha, arnaıy qorǵa túsken qarjyny jınaýǵa barlyq nıet bildirgen qazaqstandyqtar, sonyń ishinde kásipkerler de qatysqan.

Ǵımarattyń jalpy aýmaǵy 57 myń sharshy metr, bıiktigi 130 metrdi quraıdy. 3 500 kólikke arnalǵan ashyq jáne jabyq kólik turaqtary salynady dep josparlanyp otyr.

«Bul tek qulshylyq etetin oryn emes, qala qonaqtary men týrıser keletin elordanyń kórikti nysandarynyń biri bolady.  (...) Men taıaýda BAÁ-de bolyp, altynnan turǵyzylǵan sheıh Zaıd meshitin kórdim. Bul meshit 3-4 jyl buryn ǵana ashylsa da, oǵan jyl saıyn alty mıllıon týrıs barady. (...) Alla isimizge bereke bersin», - dedi Nursultan Nazarbaev tas ornatý rásiminde.

Prezıdent bul nysannyń qurylys barysyn ózi baqylaıtynyn málimdedi. «Astana 2020» qorynyń atqarýshy dırektory Nurjan Myńjasarov jýrnalıserge bergen suhbatynda meshittiń tek Ortalyq Azıada ǵana emes, búkil TMD elderindegi eń úlken meshit bolatynyn, sondaı-aq álemdegi osyndaı ǵımarattardyń alyp ondyǵyna kiretinin jetkizdi. Onyń sózine qaraǵanda, meshit eki jylda salynyp bitedi. 

Eske salaıyq, qazirgi ýaqytta Ortalyq Azıadaǵy eń úlken meshit sanalatyn Astanadaǵy «Áziret Sultan» meshitiniń aýmaǵy 17 700 sharshy metr. Ony 2012 jyldyń 6 shildesinde ashty.

Usynǵan: Maqpal Sembaı