QR Mádenıet jáne sport mınıstrligine qarasty «Áziret Sultan» memlekettik tarıhı-mádenı qoryq-mýzeıi Ulystyń uly kúni - Naýryz merekesin erekshe formatta atap ótti. Qoja Ahmet Iasaýı kesenesine kelýshilerge baýyrsaq jáne 500 lıtr naýryz kóje daıyndap taratqan qoryq-mýzeı ujymy ata-baba árýaǵyna arnap quran baǵyshtady. Jeti túrli taǵamnan daıyndalǵan bereke men molshylyqtyń sımvoly sanalatyn kójeden Germanıa, Ózbekstan elderinen kelgen týrıser men elimizdiń túkpir-túkpirinen kelgen zıaratshylar dám tatyp, alǵystaryn bildirdi, dep jazady Qamshy.kz aqparat agenttigi.

-«Handarymyz ben bılerimiz jatqan qasıetti jerde Naýryzdyń erekshe lebi seziledi. Quran baǵyshtap kelgen biz arnaıy usynylǵan naýryzkójeden dám tatyp, Allanyń nesibesi jaýyp jatqandaı sezimge bólendik. Elimiz aman, jurtymyz toqshylyqta bolsyn. Gúldenip kele jatqan Túrkistannyń tamyry tereńdeı bersin. Barshańyzdy Ulystyń uly kúnimen quttyqtaı otyryp, óz alǵysymdy bildiremin!»,-dedi  Almaty qalasynan kelgen Zarıpa Qydyrova.

Merekelik shara kesene aýmaǵyndaǵy Ardagerler saıabaǵynda jalǵasyn tapty.  Atalar men ájeler bir-birimen kórisip, Naýryz merekesimen quttyqtasa, aq túıege mingen Qydyr ata aq batasyn berip, elimizge amandyq, jurtymyzǵa tynyshtyq tiledi.

Jýyrda ǵana QR Mádenıet jáne sport mınıstri Arystanbek Muhamedıuly: «Endi zaman talabyna saı Naýryzdyń formatyn túbegeıli ózgertý qajet. Naýryzdyń aıryqsha tálim-tárbıe, qadir-qasıet beretin túrleri óte erekshe. Sondyqtan, Naýryz meıramyna jańa reńk berý úshin, adamnyń ultyna, dinı baǵynystylyǵyna qaramastan, adamgershilik qundylyqtarǵa mán bere otyryp, Qazaqstan halqy túgel qamtylatyndaı mazmunyn jasaý kerek»,- dep, Naýryz meıramyn jańasha atap ótýdiń jolyn kórsetkeni belgili.

Osy oraıda, merekeleýdiń jańa qyryna basa mán bergen qoryq-mýzeı ujymy Elbasy Nursultan Ábishuly Nazarbaevtyń «Uly dalanyń jeti qyry» maqalasyna oraı «Ań stıli» atty ulttyq kıim sán úlgilerin, tazy júgirtip, qyran baptaǵan qazaq saıatshylarynyń sherýin uıymdastyrsa, ulttyq aspaptarmen qazaqtyń halyq ánderi oryndalyp, jazba aqyndardyń Túrkistan jáne Iasaýı taqyrybyndaǵy óz shyǵarmashylyqtary el yqylasyna bólendi.

Sondaı-aq, belgili aıtysker aqyn Bekarys Shoıbekov pen onyń shákirti Turar Tileýlıevtiń «Naýryz» aıtysy jyr súıer kórermenge erekshe serpilis syılady. Aıtys barysynda handardyń esimderi, batyrlardyń dańqy, bı-sheshenderdiń abyroıy men sultandardyń sara joly óleń bolyp órilip, halyqtyń zor qoshemetine bólendi.

Merekelik jıyn barysynda sharaǵa qatysqan ájelerge aq oramal jabylyp, balalarǵa arnaıy syılyqtar berildi.

Sonymen qatar,  «Tusaý keser» rásimi jasalyp, úsh sábıdiń tusaýy kesildi. Me,rekelik jıyn ulttyq sport oıyndaryna ulasty. Jeńimpazdarǵa arnaıy syı-sıapattar berildi.

Usynǵan: Nazerke Labıhan