Nursultan Nazarbaev ókilettiligin toqtatý týraly sheshimi málimdelgennen bastap qarapaıym halyq tuńǵysh el basyǵa degen alǵystaryn bildirip, kelesi prezıdenttiń kim bolatyndyǵyna alańdaýda. Bul týraly Qamshy.kz aqparat agenttigi habarlaıdy.
Azylzat Orazbaıqyzy atty áleýmettik jeli qoldanýshysy "Tuńǵysh prezıdentimizge úlken raqmet. Qansha mıllıon halyqty basqarý ońaı sharýa emes. Qarapaıym adam bolyp, bildeı prezıdenttik ataqqa óziniń peıili men aqyldylyǵynyń arqasynda jetti. Nazarbaev osy jyldar ishinde elimizdi kórkeıtti. 1991 men 2019 jyl aralyǵyn salystyryp qarasańyz, osyndaı elde ómir súrip jatqan biz baqyttymyz. Qaryzdardy da ózi úshin emes, eli úshin aldy. Shúkir jer qoınaýymyz baılyqqa toly, odan da qutylar. Buıyrsa kelesi prezıdentimiz de adalynan bolsyn." - deıdi.
Asylzat eń bastysy elimizdiń tynysh bolýyn tilep. Nursultan Ábishulyna el basqarǵan ýaqyttary úshin alǵysyn bildirdi.
Sáýle Sarhad "Qurmetti, Nursultan Ábishuly siz elimizdiń myqty da, myń jylda bir týar patshamyz, kósh basshymyz boldyńyz. Sizge bizdiń bolashaq urpaǵymyz úshin atqarǵan eńbegińizge óz januıamnyń atynan sheksiz alǵysymdy bildiremin. Joldaýyńyzdy kórip, meniń kishi ulymnan bastap januıamyzben qatty jabyrqap qaldyq. Kishi ulym nege prezıdentimiz ketedi dep kózine jas alyp menen suraǵan kezde ózim de ne aıtarymdy bilmı qaldym. Ýaqytsha ketedi ǵoı dep kóńilin basyp qoıdym. Kóńilimiz qatty túsip, bir tiregimiz ketip qalǵandaı, ishimiz qańyrap qalǵandaı kúıde otyrmyz. Biz úshin sizdiń ornyńyzdy eshkim basa almaıdy. Sizge uzaq ǵumyr tileımiz . Elbasymyz, biz januıamyzben sizdiń aldyńyzda bas ıemiz." - deıdi.
"Iá, taqtan óz erkimen ketý de erlik! Endigi Qazaqstannyń bolashaǵy, aınalasyndaǵy azýly eldermen qarym-qatynasy, ishki-syrtqy saıasaty keler patshanyń sheberligine baılanysty. Ońaı sharýa emes, árıne. Nuraǵamyz Qazaqstandy elge tanytyp, er jetkizdi. 25 jastaǵy qylshyldaǵan jigit sekildi oń solyn tanıtyn kúsh - qaıraty boıynda. Endi tek qana alǵa, Qazaqstan! Atamyz salǵan sara jolmen." - dep eldiń bolashaǵy kemeldene túsetinine senim bildirdi Isabekova Jámıla.
Batyr Kamıla: Jaqsy kelý barda jaqsy ketý de bar. Elbasymyz dál ýaqytynda kete bildi. Elbasynyń halyqtyń qamy úshin istegen eren eńbekteri kóp. Áli de bılik basynda otyra bergeni durys edi. Endi kelesi prezıdent kim bolady eken? Jańa prezıdent jańa jańalyqtardy engizetini belgili, osy kúnimizge zar bolyp qalmasaq eken.
"Osy ýaqytqa deıin bılikti shala saıası saraptamalarmen premerden bastap, depýtatqa deıin synasam da, prezıdentke qatysty birde bir ne maqtaý, ne dattaý jazǵan emespin. Nege? Óıtkeni prezıdent bolý óte qıyn. Onyń jaýapkershiligi júz atannyń júginen aýyr. Iá, 1991-den beri "qap" dep san soqqan da, qýanǵan da sátter kóp boldy. Men kózimdi tyrnap ashqan sátte Elbasy prezıdent edi, jasym shırek ǵasyrǵa jetip, eki balanyń ákesi bolǵan sátte Qazaqstan jańa kezeńge qadam basty. Elbasynyń saıası qyzmetine tarıh áli óz ádiletti baǵasyn bere jatar. Deı-tura Elbasy óz halqyna asa mańyzdy saıası sheshimderdi jasaı bildi dep baǵalaımyn.Astanany kóshirý arqyly geosaıası qadamǵa bardy.Tarydaı shashyraǵan qazaqty jınaý úshin qyzmet etti. Ol qasıetti mısıany kelesi basshy jalǵastyrýy tıis.Qazaq shekarasyn shegelep berdi. Soltústikti qazaqylandyrý úshin baǵdarlama ashty. Túrkistandy ortalyq etti. Sóıtip tarıhı ári saıası qadamǵa bardy. Álipbıdi latynǵa kóshirýdi bastady. Qazaqty tanytý jolynda eńbegi eren. Árıne, atqarylar sharýa kóp. Kelesi basshynyń qyzmeti tipti aýyr. Álemdik alpaýyttardyń geosaıası qaqtyǵysynan qazaqty aman alyp shyǵý mısıasy tur."- deıdi Asqat Qasenǵalı.
Asqat "Qazaqqa Qudaı bul jolda jar bolsyn! 90-jyldardyń maıshamynda dúnıege kelgen balanyń, 19-dyń jaryǵynda sizge aıtar alǵysy bar, qurmetti Elbasy! Álemdik saıasat ol maıdan qyl sýyrǵandaı názik dúnıe. Qatty bassań synyp, kúsh salsań maıysyp keter qaýipti is. Sol qaýipten halyqty aman alyp shyqqanyńyzǵa Raqmet!" - dep Nursultan Ábishulyna alǵysyn bildirdi.
Maqsat esimdi áleýmettik jeli qoldanýshysy ákem ketkendeı kúı keship otyrmyn deıdi.
"Ne boldy eken bundaı sheshim qabyldaýǵa? Men ákem ketkendeı kúı keship otyrmyn. Bul kisi otyrǵanda bir kúshti sezinýshi edim. Eldiń tynyshtyǵyn ustaǵanynyń ózi úlken erlik dep bilemin. Men bul kisini kóp eńbek sińire bildi dep baǵalaımyn. Endi ne bolatyny belgisiz. El úshin, jer úshin, urpaq úshin qorqamyn. Ne bolsada jaqsylyq bolǵaı" - dep Nazarbaevqa alǵysyn aıta otyryp oıyn qortyndylady Maqsat.
Usynǵan: Farıza Jomartqyzy
