«Nur Otan» partıasy Tóraǵasynyń Birinshi orynbasary Máýlen Áshimbaev Nursultan Nazarbaevtyń Qazaqstan Respýblıkasynyń Prezıdenti retindegi ókilettigin toqtatý jónindegi sheshimine qatysty pikir bildirdi. Bul týraly ol óziniń Facebook-tegi paraqshasynda jazdy.

«Barlyq qazaqstandyqtar sıaqty ekiudaı sezimde otyrǵanymdy jasyrmaımyn. Bir jaǵynan, Qazaqstannyń Tuńǵysh Prezıdenti óziniń Qazaqstan Respýblıkasynyń Prezıdenti retindegi ókilettigin toqtatqany ókinishti. Ekinshi jaǵynan, Elbasynyń erligi men aqyly qurmet tutýǵa ábden laıyq.

Bárimiz bul sheshimniń aıaqasty qabyldanbaǵanyn bilemiz. Nursultan Ábishulynyń bul qadamdy qansha saǵat, neshe kún oılanyp jasaǵanyn tek oımen shamalaýǵa bolady. Biraq Elbasy memleket pen halyq múddesi úshin árdaıym durys sheshimder qabyldap kelgeni belgili. Sondyqtan bárimiz bul sheshimge qurmetpen qarap, Tuńǵysh Prezıdent saıasatynyń jalǵasýy úshin qoldan kelgenin bárin jasaýymyz kerek. Bul – qazaqstandyqtardyń Tuńǵysh Prezıdenttiń tulǵasy men qyzmetine kórsetken qurmeti bolady.

Elbasy Qaýipsizdik Keńesiniń Tóraǵasy, «Nur Otan» partıasynyń Tóraǵasy, Konstıtýsıalyq keńestiń múshesi retinde eldiń damýyndaǵy mańyzdy rólin saqtap qalady.

Nursultan Ábishuly Nazarbaev Elbasy, Ult kóshbasshysy bolyp qala beredi. Ol – táýelsiz Qazaqstannyń negizin qalaýshy, el ishinde jáne álem sahnasynda bedeli joǵary saıasatker. Keńes Odaǵynan keıin qarqyndy damý deńgeıindegi ekonomıkasy bar turaqty jáne áleýmettik memleket qurǵan tulǵa.

Qazaqstannyń Tuńǵysh Prezıdentiniń jigeri men batyl sheshimder qabyldaý qabiletiniń arqasynda elimiz táýelsiz memleket bolyp qalyptasty. Halqymyz Elbasynyń basshylyǵymen 90-jyldardaǵy stagnasıa men saıası kollapsty jeńdi. Elbasynyń eńbekqorlyǵy men batyldyǵy eń qıyn synaqtardy, álemdik saıası jáne qarjylyq daǵdarystardy eńserýge kómektesti. Otyz jyl ishinde Nursultan Nazarbaev álem kartasynda jańa ári zamanaýı memleket qurdy.

Qazaqstan árqashan turaqtylyq pen senimdi damýdyń úlgisi boldy. Elbasy beıbitshilik pen ultaralyq kelisim strategıasyn quryp, júzege asyrdy. Qazaqstandaǵy konfesıaaralyq dıalog pen toleranttylyq modeli kóp elge úlgi kórsetip otyr.

Elbasynyń ıadrolyq qarýǵa qarsy bastamalary búkil álemdik qaýymdastyqtyń qurmetine bólendi. Nursultan Nazarbaev ıadrolyq qarýdyń eń iri arsenalynan bas tartyp, ıadrolyq polıgondy óz erkimen japqan birinshi saıasatker boldy. Qazaqstannyń Tuńǵysh Prezıdentin álemde ıadrolyq qarýǵa qarsy qozǵalystyń kóshbasshysy dep ataıdy.

Qıyn jyldary Tuńǵysh Prezıdent saıasatynyń arqasynda el ekonomıkasyna mıllıardtaǵan dollar ınvestısıalar quıylyp, ondaǵan myń jańa jumys oryndary ashyldy.

Elbasy memlekettiń odan ári damýyna jaqsy negiz qalyptastyryp berdi. Ol – 2030 jylǵa deıingi strategıany merziminen buryn oryndap, álemniń básekege qabiletti 50 eliniń qataryna kirýge múmkindik bergen qazaqstandyq ekonomıkalyq modeldiń avtory.

Qazaqstandyqtardyń ál-aýqatynyń ósýi – Elbasynyń taǵy bir mańyzdy jetistigi. Tuńǵysh Prezıdent halyqtyń ómir sapasyn arttyrýǵa, jastardy jáne kóp balaly otbasylardy qoldaýǵa, bilim berý men densaýlyq saqtaý salasyn damytýǵa erekshe kóńil bóldi. Myńdaǵan jastyń «Bolashaq» baǵdarlamasymen shetelde úzdik bilim alýy – Elbasynyń zamanaýı Qazaqstandy qalyptastyrýǵa qosqan ólsheýsiz úlesi.

Jańa urpaq Tuńǵysh Prezıdentke beıbitshilik pen kelisim, ekonomıkalyq ósim men saıası turaqtylyq, qýatty memlekette ómir súrý men damýǵa berilgen múmkindik úshin alǵys aıtary anyq.

Elbasynyń jastarǵa «Táýelsiz Qazaqstandy – bizdiń ortaq Otanymyzdy saqtańyzdar. Máńgilik el – bizdiń halqymyz ben ata-babalarymyzdyń jeri. Bizdiń bir Otanymyz ben bir jerimiz bar. Halqymyzdyń birligi men dostyǵyn, eldiń kez kelgen azamatynyń mádenıeti men dástúrine qurmetti saqtańyzdar», degeni úlken jaýapkershilik júkteıdi.

Qazaqstan úshin mańyzdy tarıhı kezeńde halqymyz birlik pen jalpyhalyqtyq kóshbasshynyń baǵyt-baǵdaryna qoldaý tanytýy kerek. Aldymyzda elimizdiń damýy men azamattarymyzdyń ómir sapasyn arttyrýǵa baǵyttalǵan kóp mindet tur.

Barlyq qazaqstandyqtardy bir kisideı jumylyp, qoǵamdyq kelisimdi saqtaýǵa shaqyramyz. Bul kezeńnen birge ótip, sózimizben jáne isimizben Elbasynyń saıasatyna tolyqtaı qoldaý bildirýimiz qajet. Ortaq Otanymyz – Qazaqstan Respýblıkasynyń odan ári damýy men gúldenýi bárimizge baılanysty, – delingen jazbada.