Es jıǵaly kórgenim, bilgenim, daýys bergenim – bir-aq prezıdent. Ol 1991 jyldan bastap el basqaryp keledi, men 1994 jyly dúnıe esigin ashtym. 2015 jylǵy prezıdent saılaýynda ýnıversıtet qabyrǵasynda oqyp júrip, «Meniń prezıdentim – Nursultan Nazarbaev», «Nazarbaevsyz Qazaqstan degen memleket bolmas edi» degen uranmen sol kisige alǵash ret daýys berdim. Daýys bererde, «shynymen Nazarbaevty belgiledim be?» dep aq paraqqa qaıta-qaıta qarap, ózge bireýdi belgilep qoısam, Nazarbaev jeńiske jete almaı qalatyndaı kúı keship, qobaljyǵanym, qoldarymnyń dirildegeni áli esimde. Tek sol kisige sendim, Qazaqstandy tyǵyryqtardan alyp shyǵatyn jan dep uqtym. Dálirek aıtqanda, shynaıy ómirge, arpalysqa endi qadam basyp kele jatqan boıjetkenge munyń bárin sendirgen bizdiń qoǵam boldy. Bizdiń mektep, ýnıversıtet, bizdiń muǵalimder, ata-anamyz odan ózge prezıdent eldi basqara almaıtyndaı sendirdi meni. Nemese ózim ańqaý boldym ba?!
Mine, jasym shırek ǵasyrǵa taıady. Men bir kezderi «erekshe qurmettegen» prezıdent ókilettiligin toqtatty. Ony keshe keshkisin jolda ketip bara jatyp estidim. Ústimnen bireý muz toly sý tógip jibergendeı boldy. Keshe túste ǵana «Elbasy Nursultan Nazarbaev, QR Prezıdenti Nursultan Nazarbaev» dep jarysa jazyp jatqan edik. Bir saǵatta bári ózgerip sala berdi. Ol mıllıondaǵan halyqtyń kózinshe «Ókilettiligin toqtatý» týraly qujatqa qol qoıdy. Oǵan bárimiz kýá. Sener-senbesimdi bilmedim. Kóz ashqaly tek Nazarbaevty prezıdent dep tanyǵan men ózge el basshysyn shynymen elestete almadym. Ornyna senat tóraǵasy Qasym-Jomart Toqaevty qaldyryp ketipti. Ol bólek áńgime...
19.03.19. Bul qazaq eli úshin tarıhı data. 30 jyl el basqarǵan prezıdent merziminen buryn ókilettiligin toqtatqan kún. Bul kúndi qazaqtyń 60-70 paıyzy asyǵa kútti. Shynymdy aıtsam, Nazarbaevty «erekshe syılaǵan» men de kúttim. Nege? Iá, ýnıversıtet qabyrǵasyna deıin ańqaý bolyp júrgen boıjetkenniń arpalysqa toly qoǵamǵa qadam basqanda kózi ashyldy. Qoǵamǵa basqa kózqaraspen qaradym, bılikti tanydym. Saıasatqa da kóz saldym. Alaıda marqum atamnyń «Nazarbaev – erekshe tulǵa. Oǵan Allanyń nury jaýǵan. Memleket basshylaryn tańdaıtyn Alla Taǵala. Al Nazarbaev qazaqtyń basyna bitken baq» degen sózderi tosqaýyl bolyp júrdi. Sol sebepti Elbasyny jaqsy kórdim. Iá, shynymen jaqsy kórdim. Buǵan atam sebep pe, álde basqa ma? Jaýabyn ózi de bilmedim...
Keshke «aıdy aspanǵa shyǵarǵan» jańalyqty estidim de, úıge kirdim. «Nazarbaev endi prezıdent emes. Ne bolar eken?» Uıyqtar aldynda da, túnde oıanyp ketsem de, osy suraqtardy oıladym. Erteń bizdi ne kútip tur?
Oıatqysh saǵaty shyr etti. Nazarbaev ketip, dala da, qala da, adam da, jalpy qoǵam ózgerip ketti me eken? Terezeni ashtym, kún jarqyrap tur, ázirge esh ózgeris joq. Teledıdardy qostym, sol baıaǵy baǵdarlamalar, serıaldar, bári qaz qalpynda. Bul jer de tynysh. «Jumysyma baraıyn, ondaǵy atmosfera ózgeshe shyǵar» dep oıladym. Avtobýsqa mindim, sol baıaǵy tańǵy uıqylaryn qımaı, jumysqa áreń bara jatqan jolaýshylar. Nazarbaevty oılap ne qýanyp, ne muńaıyp otyrǵan birin kórmedim. Báriniń qabaqtarynan qar jaýyp tur. Salon ishine áreń syıyp, bireý «á» dese, ekinshisi «má» deýge daıyn turǵan jurtshylyq. Já, avtobýs ishi de ózgerissiz. Radıoda da sol baıaǵy áýender. Jumysqa keldim, bári baz qalpynda. Prezıdenttiń oryntaǵyn bosatqanyn alǵash kórgen men de ózgergen joqpyn. Jalpy, prezıdentterdiń aýysqany qandaı bolady? Muny áli sezinip jatqan joqpyn. Mınıstrlerdiń aýysqanyn kórgenimmen, óz elimniń prezıdentiniń aýysqanyn kórmegem. Kóz aldymda áli de sol adam, prezıdenttiń taǵynda otyrǵan da Nazarbaev sekildi. Al siz qandaı sezimdesiz?
Gúlim Jaqan
