2019 jyldyń 19 naýryzynda, Nursultan Ábishuly Nazarbaev óziniń El Prezıdenti ókilettigin toqtatyp, óz erkimen Ata Zańymyz boıynsha Senat Tóraǵasyna ýaqytsha berýi jaıynda aıtqanyn teledıdardan tyńdaǵanymda, qatty tolǵanysqa túskenimdi jasyra almaımyn. Jaqynda ǵana «Nur Otan» partıasynyń XVİİİ sezinde delagat bolyp qatysqanda, óz kózimmen kórgen, óz qulaǵymmen estigen Elbasy beınesi kóz aldyma kelip, erekshe tolqý kúıin keshtim. Bir men emes, búkil sıez delagattary partıa tóraǵasynyń nurly kelbetinen logıkalyq qýatty, ıdeıalyq jarqyn muratty, nyq dáıektelgen senimdilik, sezimin keshken edik. Árıne, bul meniń kóńil-kúıim. Tarıh bir orynda turmaıdy, qoǵam qajetine qaraı ózgerip, jańaryp otyratyn qubylys bizge de tán degen oımen ózim-ózime kelgenimdi jasyra almaımyn.

Elimiz Táýelsizdik alyp, basymyzǵa baqyt qusy qonǵan kezde El Prezıdenti bolyp saılanǵan Nursultan Ábishuly Nazarbaevtyń Respýblıkamyzdy durys jolǵa salatynyna oǵan biraýyzdan daýys berip qoldaǵan halyq qatarynda ımandaı sengen muǵalimder qaýymymen birge men de sendim. Senimimiz aqtaldy da. Elbasy qazaq elin álemdegi órkenıetti elderdiń, qazaq halqynyń álemdegi ozyq bilimdi, ozyq ǵylymdy bolatynyna qazaqstandyqtardy sendirdi, ózi usynǵan «Qazaqstan – 2030» strategıalyq Baǵdarlamanyń oryndalýyn basqaryp, «Qazaqstan – 2050» Baǵdarlamasynyń júzege asýyn qamtamasyz etetin joldardy naqty anyqtap berdi. Tuńǵysh Prezıdentimiz álemde daralanyp tanyldy, álem saıasatkerleriniń ishindegi ozyǵy dárejesinde ekenin halqy baǵalap, tórtkúl dúnıe moıyndady.

Halyq úshin eń úlken baqyt-bıliktiń myqtylyǵy, danalyǵy ekeni jalpyǵa aıan. Elbasymyz ishki saıasatty da, syrtqy saıasatty da ishki jaǵdaımen jáne halyqaralyq tynyspen sheber úılestirip, memleketimizdiń negizin qalap, ony nyǵaıtyp, álemdegi damyǵan 30 eldiń biri bolýyna kósemdik basshylyq etti. Keńesti el kemimes dep, buǵan halqymen birge qol jetkizip, osy syndarly kezeńde Prezıdenttik bılik utymdylyǵynyń úlgisin kórsetti. Sherhan Murtazanyń: «Elbasy-bireý, halqy-tireý» degeni – ózi kýá bolǵan is. Qashandaǵy júıeli jóndilikti biletin halqymyz: «Esim hannyń eski joly, Qasym hannyń qasqa joly» dep, alash jurtyna jol-joba salyp bergen kemeńgerlikke adal kózben qaraǵan dástúrinen aınymaı, Ata Zańymyz, asa mańyzdy tarıhı Baǵdarlamalar,

Joldaýlar t.b. baǵyttardy ádil de joǵary baǵalap, oryndap jatqany – tarıhı aqıqat. Jaqsylyqqa sendirý úshin shyn jaqsylyq jasaýdy bastaý abzal degen – osy! Jaqsylyqtar tek jaqsylyqtan ǵana týyndaıdy.

El bolam deseń aldymen ózińdi, odan soń besigińdi túze degen aldyńǵy býyn oıshyldarymyzdyń ósıetteriniń jáne ult murattarynyń jalǵasy retinde «Mádenı mura», «Rýhanı jańǵyrý», «Uly Dalanyń jeti qyry» sıaqty bastamalarymen Elbasy ult besiginiń ulttyq mazmunynda ómir súrip, ósip – ónýine jol ashty.

Memlekettik danalyqty baǵalaýǵa da danalyq kerek-aq. Osy oraıda oqyrmandar súıispenshiligine bólingen, adamı baqyttyń jarshysy atanǵan jazýshy Ázilhan Nurshaıyqovtyń sózi oıǵa oralady. «El basqarý – eń úlken óner. Ol ekiniń biriniń, egizdiń syńarynyń qolynan kele bermeıdi. Boıyna halyqtyq kóp qasıetter jınaqtalǵan adamnyń ǵana qolynan keledi. Ol shynshyl, alǵyr, kósem, aıtqysh, uıymdastyrǵysh, boljaǵysh, sezgish, sergek bola bilý kerek. Ushqyr oıy ıgilikti istermen ushtasyp jatýy jón. Halyqty basqarý úshin halyqtyń oıyndaǵy barlyq óner, bilik, parasat kóseminiń kókireginde kúmbirlep turýy kerek. Mindet – maqsatyn tyńǵylyqty ispen tıanaqtaıdy. Osy jáne basqa halyqtyq qasıeterdiń bári qazirgi Prezıdentimizdiń basynda bar. Ony halyqpen qabystyryp otyrǵan da osy qasıetter», – degen edi.

Elbasynyń bul basshylyq erekshe qasıetteri bilim berý salasynda da reformalyq isterde kórinis tapty. Táýelsiz el úshin otandyq tól oqýlyqtardy daıyndap engizý, qabilet – daryny joǵary balalar úshin Nazarbaev zıatkerlik mektepteri men Nazarbaev ýnıversıtetin uıymdastyrý, «Bolashaq» baǵdarlamasy boıynsha myńdaǵan jastarymyzdyń shetelderde eń ozyq ýnıversıtetterde bilim men tájirıbe alyp, el ıgiligine qyzmet etip jatqany, bilim mazmunyn jáne oqytý tehnologıalary túbegeıli jańǵyrtyp, úsh tildi meńgerýine jaǵdaı jasap otyrǵany, mektep pen balabaqshalar úshin myńdaǵan jańa ǵımarattar turǵyzǵany, túptep kelgende synı oılaı alatyn, básekege qabiletti, kommýnıkatıvtik daǵdylardy qalyptasqan kreatıvti tulǵa daıyndaý maqsatyn júzege asyryp otyrǵany t.b.s.ss jeńisti de jemisti jańalyqtar gallereıasy qoǵam damýyna erekshe serpin berýde.

Maǵan Elbasy, Ult kóshbasshysy Nursultan Ábishuly Nazarbaevtyń óz qolynan «Qazaqstannyń Eńbek Eri» jáne Altyn Juldyz ben «Otan» ordeni marapattaryn elimizde birinshi bolyp alý baqyty buıyrǵan edi. Sodan biraz jyl ótken soń, Astanada memlekettik mándi bir úlken jıynǵa shaqyrylǵandardyń biri retinde kóp ishinde turǵanymda, Elbasy arnaıy nazar bólip, «olımpıada jeńimpazdaryn shyǵaryp jatyrsyz ba?» degen sálemine ıe boldym. Prezıdentimizdiń jas urpaq tárbıesin árqashan este ustaıtynyna kóz jetkizgen edim.

Al búginderi halyqqa áleýmettik qoldaý men kómekti kúsheıtýge úkimetke arnaıy tapsyrma berip, onyń oryndalýyna tikeleı óz baqylaýyna alǵany da belgili. Bul Prezıdenttiń halqymen birtutastyǵyn taǵy da aıǵaqtaı túsip otyr.

Kórnekti memleket qaıtarkeri Ómirbek Báıgeldiniń myna tómende keltirilgen pikirin óz basym kúni búginderi de asa ózektilikti dep sanaımyn:

«Nazarbaevtyń el tarıhynda alar ornyn áli tolyq túsinip bolǵanymyz joq der edim. Nursultan Ábishulyn ardaqtaý, qorǵaý, saqtaý-eldigimizdi ardaqtaý, qorǵaý, saqtaý. Nazarbaevtyń eldi basqarýyna qaı jaǵynan da jaǵdaı jasaý arqyly biz Qazaqstannyń kemel keleshegine, berik bolashaǵyna jaǵdaı jasaımyz, árqaısymyzdyń eńseli erteńimizge negiz qalaımyz» (Baıgeldi Ó. Mártebe// «Egemen Qazaqstan» 2009 jyl, 6 shilde).

Memlekettiń ishki, syrtqy Saıasatyn saraptap, Urysqa uryndyrmaı, soǵysqa soqtyqtyrmaı, Halyqty beıbit órkendetý jolymen Alǵa basyp kele jatqan Qurmetti Prezıdentimiz Nursultan Ábishuly aman bolsyn! – deımin.

Jarıalanǵan Úndeýde aıtylǵandaı, Elbasynyń óz bastamashyldyǵymen jobalanyp josparlanǵan memlekettik Baǵdarlamalardyń oryndalý jeńisi men jemisin halqymen birge kórýine tilektespin!

Aıagúl Tóreqyzy Mırazova

Qazaqstannyń Eńbek Eri,

«Altyn juldyz», «Otan» ordenderiniń ıegeri

Qazaqstanǵa eńbegi sińgen qyzmetker,

Almaty qalasynyń,

Jambyl oblysynyń,

Jýaly aýdanynyń

Qurmetti azamaty