Astananyń ataýy Nursultan bolyp resmı ózgertýge sheshim qabyldandy dep jazady Qamshy.kz aqparat agenttigi. QR Parlamenti palatalarynyń birlesken otyrysynda Astananyń ataýyn Nursultan qalasyna ózgertý týraly zań jobasy eki oqylymda qabyldandy. 

"Senattaǵy 43 depýtattyń 43-i kelisti. Májilistegi 103 depýtattyń - 103-i kelisti. Osylaısha, qurmetti áriptester, tarıhı sheshim qabyldandy", - dedi Májilis tóraǵasy Nurlan Nyǵmatýlın palata otyrysynda.

«Memleket basshysy Konstıtýsıanyń 91-babynyń 1-tarmaǵyna sáıkes, Parlamenttiń qaraýyna «QR Konstıtýsıasyna ózgerister engizý týraly» Qazaqstan Respýblıkasy zańynyń jobasyn engizdi. Bul joba respýblıka astanasynyń ataýyn Astana qalasynan Nursultan qalasyna ózgertýdi kózdeıdi. «QR Konstıtýsıasyna sáıkes, Úkimet Ata Zańymyzǵa Astananyń ataýyn ózgertý týraly túzetý engizý úshin Respýblıkalyq referendým ótkizý jóninde QR Prezıdentine usynys jasady. Prezıdent bul usynysty referendýmǵa shyǵarmaı, Parlamenttiń qaraýyna jiberý týraly sheshim qabyldady. Bul másele boıynsha Konstıtýsıalyq Keńes óziniń oń qorytyndysyn da berdi», - dedi Parlament Májilisiniń tóraǵasy Nurlan Nyǵmatýlın.

Eske salsaq, búgin Parlament úıinde halyqqa ant bergen Qasym-Jomart Toqaev prezıdent retinde alǵashqy málimdemesin jasady. Elbasy Nusrultan Nazarbaevqa alǵys aıta otyryp, óz usynystaryn aıtty. Solardyń alǵashqysy Astana qalasy men Qazaqstannyń ortalyq kósheleriniń ataýyn Nursultan Nazarbaev etip ózgertý.

Usynǵan: Ásel Bolatqyzy