Bir erekshe qýat syılar denege,
Qýanyshty - kóz bitkender kóre me?
Shetsiz, sheksiz, meniń Uly Dalama,
Áz Naýryz, qadam basyp kele me?
Kóshi qonǵan, oty janyp óshkenniń,
Barlyq júzge bir ǵajaıyp kóshken nur!
Uly Elime, Kóktem bolyp ǵajaıyp,
Bir jyl kútken Áz Naýryz, hosh keldiń!?.
Qazaǵymnyń, arly arýy sıaqty,
Qazaǵymnyń, er uldary sıaqty,
Naýryzda, saı-saladan sý aqty,
Naýryzda, kúnniń kózi shýaqty!
Kógimizde shýaq shashyp kún turar,
Júrek bitken, dúrs-dúrs soǵyp, bulqynar!..
Qazaǵymnyń arýlary bul shaqta,
Qyzǵaldaqtaı bir erekshe qulpyrar!
Kári bitken, jastyq shaǵyn oılaı ma?
Qurǵyr oılar, mazalamaı qoımaı ma?
Jas tólder men bala bitken shattanyp,
Qyrǵa shaýyp, asyr salyp oınaı ma?
Keldi halqym, Áz Naýryz - «Jyl basy»,
Basqasha aıtsaq, «jas tólderdiń qurdasy»,
Naýryz-arý, kele me áne, sylańdap,
Órekpigen jas kóńilder syrlasy?..
Júrekterdi ystyq oılar órelep,
Janarlardan otty sezim sebelep,
Bul ýaqytta jer-dúnıe jasarar,
Jas, kári de, qýnap qalar keremet!
Erkek, áıel, bir-birine yntyǵar,
Júrek bitken, alyp-ushyp, umtylar!
Áz Naýryz, mahabbattyń aıy ma,
Ǵashyqtyqtar – qyr gúlindeı qulpyrar!?.
...Babalardan qalǵan sóz kóp kósheli,
Qanatty oılar - jeldeı júıtip, esedi!..
Naýryzda, kelgen kezde «Jyl basy» -
Ókpe-renish umytylar desedi...
Jol bermesteı bolyp endi «qataǵa...»,
Jaqsy adamdar - Naýryz-dámnen tata ma?
Birin-biri Áz Naýryz kelgende,
Bizdiń Qazaq, keshirisip jata ma?
Ókpeni qoı, áı, dosym-aı, dosym-aı!
Áppaq kóńil, syı-qurmettiń tosyny-aı!
Bir jyl buryn bolǵan ókpe-renish,
Umytylyp jata ma eken osylaı?..
Qonaq bitken, asyǵysyp, keshigip,
Kóńil bitken, arqa-jarqa sheshilip,
Nasybaıdan qalǵysh Qazaq kóńili,
Jatatyndaı tós qaǵyspen sheshilip?
Jaýtańdar kim, kóńili ketip «qaraqqa»?
Oıy keter alýan túrli tarapqa?
Bul Qazaqtaı Ult bar ma eken álemde,
Ókpeleý men qýanýy – zamatta?..
Bastan óter: jaqsy, jaman, masqara,
Jaqynyńdy biraq jaýǵa tastama!..
Aǵaıyn men dos-jarandar ishinde,
Oryn alǵan ókpe-renish basqa ma?..
Keıbir ókpe, jarasa ma erińe,
Tura ma ózi birdeńe aıtyp, «derińe...»?
Jaqyndardyń ishindegi ókpeler
«Sháıi oramal kepkensheniń» keri me?..
Kóp nárseni biz kókeıge túıdik pe,
Úlken jaǵy dep zekirer: «kılikpe!?.»
Bir bólek te, dos-jarandar ókpesi,
Bir bólek pe, degen ókpe bılikke?..
Búgin halyq, uıqyda emes, oıaý ma?
Jemqor bitken óle-ólgenshe toıar ma?
Han, patshadan qalǵan Ulttyń kóńili,
Renishi... - umytyla qoıar ma?..
Ondaı patsha bilem túbi ońbaıdy,
Qashsa daǵy urpaǵymen sorlaıdy!..
Shynyn aıtsam, Ult kóńilin qaldyrǵan,
Desedi ǵoı: «eki dúnıede ońbaıdy!..»
İs ońalar, alǵan betten qaıtpasań,
Jolyǵasyń áli talaı jáıitqa san...
Áz Naýryz - jyldyń basy kelgen soń,
Jarasa ma Aqıqatyn aıtpasań?
Bári qolda turǵan kezde «múmkinniń»,
Joǵalmaıdy astyndaǵy El, bir týdyń!
Sondyqtan da ashyp aıttym, aǵaıyn,
Qýanysh pen renishin Ultymnyń!
...Áz Naýryz, qutty bolsyn, Qazaǵym!
Artta qalsyn, kórgen qorlyq, azabyń!
Kelgen Naýryz - Shyndyq bolsa qanshalyq,
Óle-ólgenshe men de Shyndyq jazamyn!
Jumash Kenebaı
Pikir qaldyrý