Ánshi men asabanyń, kelinniń betin ashatyn jattama «aıtqyshtardyń» (aqyn deýge aýyzym baryńqyramaı tur) aldyn-ala tapsyryspen, asyǵys-úsigis, mınýt sanap júretinin biz jaqsy bilemiz. Olar bir kúnde birneshe tapsyrys alyp, bir toıdan ekinshi toıǵa sekirip, ázer úlgerip, súrinip-súrligip júre beredi. Jarty saǵat, bir saǵat keshigý – olar úshin jazylmaǵan zań! Ana toıdan shyǵyp, myna toıǵa kelip úlgerem degenshe, ýaqyt shirkin bir ornynda toqtap turmaıdy ǵoı...

Asabanyń táýekelshilep qabattastyra toı alyp qoıǵanyn eki jaq ta bilmeıdi. Asaba bul qupıany eshkimge ashyp aıtqan emes. Tapsyrys qabyldap jatqanda, ózge tapsyrysy bar ekenin bile tura, «úlgerip qalarmyn» degen úmitpen toı ıesinen ishki esebin búgip qalady. Keıbir jıyndardyń eldi kúttirip, kesheýildep bastalyp jatatyny sodan. Sondaǵy kiná – asabanyń qulqynyna jumyr bolmaı turǵan qý aqsha. Qarmap qalý kerek, jalmap alý kerek! Osyndaı pysyqaılyqpen bir kúnde úsh-tórt jıynǵa baryp úlgeretin asabalardy biz jaqsy bilemiz.

Asabany qoıshy, olardy ártis dermiz, endi moldanyń da birneshe tapsyryspen júretinin kórip, tań qala bastadyq. Quran baǵyshtap dastarhan jaıyp jatqan úıdiń kelinderge: «moldekeń taǵy bir quranǵa barady eken, tamaqty erterek túsire berińder!» dep tapsyrma berip jatqanyn talaı estidik. Moldekeń de muny maquldaǵandaı, asyǵys-úsigis ýaǵyz aıtqansyp, eki rákatty bir rákatqa túsire oqyp, betin bir sıpaıdy da, shyǵa beriste úı ıeleri nıet etip bergen bes-on teńgeni saýsaq ushymen ilip alyp, asyǵystap, jónimen kete barady.

Asabanikin – nan taýyp jep júrgen kásibi dermiz, al moldaniki ne? Álde, quran oqý da kásipke aınalyp bara ma?

Bekjigit Serdáli