"balapan telearnasy byltyr aldyna qoıǵan basty maqsattarynyń biri - anımasıa sapasy men sanyn arttyrý jumysyn qal-qadirinshe júzege asyrdy. Onyń barlyǵy týraly osy áleýmettik jelilerde jazyp otyrdyq, suhbat berip, prezentasıa ótkizdik. Bizdiń shyǵarmashylyq top "ǵaryshtyq jyldamdyqpen" jumys istedi. Úlken maqsattar qoıdyq. Jumystyń aýqymdylyǵynan synyp kete jazdaǵan sátimiz bolsa da, ár anımatordy, rejıserdi, senarısti, prodúserdi qanattandyryp, jańa sapaǵa, bıikke umtyldyrdyq. Bir jyl ishinde júzege asyrylýy qaı turǵydan da qıyn ári múmkin emes jobalardy judyryqtaı jumylyp jasap shyqtyq. Bul - bizdiń bylaıǵy elge bilinbeıtin kishkentaı erlikterimiz.
Tuńǵysh ret sýper qaharmandar jasadyq. "Aıdar", "Ertemir", "Dala oıyndaryn" óndiriske jiberdik. "Qońyr qaz" degen atpen qazaqtyń 20 kúıin anımasıaladyq. "Shahmat patshalyǵy" 32 serıaly shahmat úıretý mýlthıkaıasyn túsirdik. 20 serıaly "Dara tulǵa" serıalyn júzege asyrdyq. "Babalar sózi" anımasıalyq rolıkterin (30 dana) usyndyq. "Kel. shyrqaıyq!" degen atpen ónegeli ánder sıklin (20 dana) túsirdik. "Orman kúzeti" degen eksperımentaldy serıalymyzdy júzege asyrdyq.
Balalar bul jobalarymyzdy asqan yrzashylyqpen qabyldady. Arnadaǵy reıtıńterimiz álemdik stýdıalardyń kórsetkishinen ozdy. Biz balalardyń kókeıindegi dúnıelerdi dóp basý úshin barynsha eńbektendik. Bul synnan súrinbeı ótken sekildimiz.
Biraq, shyǵarmashylyq top kórkemdik, sapalyq turǵydaǵy kemshilikteri úshin óz "sybaǵalaryn" aldy. Bul kemshilikterdi jolaı jóndeý, retteý múmkin emes edi, oǵan nazar salsaq, komandany kúıretip alý qaýpi turdy. Óıtkeni, sapa, kórkemdik - jasap kórgende ǵana shyńdalady. Mundaı jobalarmen betpe-bet kelmegen jastardy sol kópirden aman alyp ótý mindeti de balapan-da boldy. Jáne bul mindetti biz de jan-júregimizben sezindik.
Stýdıalardy, qoıýshy rejıserlerdi tizimdep alyp, ózim birlese jumys isteýge shaqyrǵan sol kúnnen beri anımasıalyq keńistikte múddelestik, ıdeıalastyq, qaýymdystyq qalyptasty dep oılaımyn. Bizdiń búgingi ortaq iske jumylǵan jaýapkershiligimizge qyzyǵa qaraýyńyzǵa bolady.
Biz bıyl jańa sapa, jańa kórkemdik deńgeı usynǵymyz keledi. Soǵan kirisip te kettik. Jańa qoıýshy rejıserlar tárbıeleý isin ár stýdıadan talap etip otyrmyn. Anımatorlardyń kelesi býynyn qanattandyrý - bizdiń taǵy bir mindetimiz. Bıyl biz tyń sheshimder, stılısıkalyq erekshelikter, taqyryptyq izdenister turǵysynan da bir adym alǵa jyljımyz. Fýndamentaldy dúnıelerge kirisemiz. Biraq, ýaqyt bizden bir adym emes, on adym jasaýdy talap etip otyr. Biz tyrysamyz! Jáne aldymyzǵa qoıǵan maqsatty oryndaımyz dep senemin. Bıyl arnamyz anımasıalyq jobalar sanyn 10-nan 13-ke arttyrdy. Osy istiń bárinde shyǵarmashyl jastardyń janynan tabylǵany úshin Erlan Tynymbaıuylyna rahmet aıtqym keledi. Al biz kózimiz jarqyrap, jańa jobalarǵa kiristik." (orfogr. saqtalǵan)
♦Maqpal Jumabaıdyń feısbýk paraqshasynan
Usynǵan: Maqpal Sembaı
